Дьааҥы дьоруойдарын умнубат

Бүтүн Арассыыйатааҕы “Служение” бириэмийэҕэ Дьааҥы оройуонун Адыаччы нэһилиэгин урукку баһылыга,  байыаннай дьайыыга сылдьан  ааспыт сыл ахсынньытыгар олоҕун толук уурбут Вячеслав Слепцов Саха сириттэн соҕотох номинант быһыытынан киирдэ.

 Чахчы хоту хоһууна

Дьааҥы Алыһардааҕыттан төрүттээх Адыаччы нэһилиэгин умнуллубат аҕа баһылыга, “За укрепление боевого содружества” мэтээллээх байыаннай дьайыы бэтэрээнэ Слепцов Вячеслав Вячеславович хоту дойду хоһуун уола буоларын быһыытынан, оҕо эрдэҕиттэн сытыы-хотуу майгылаах киһи этэ. Бэйэтин этинэн-хаанынан хоту дойду олоҕун-дьаһаҕын бэркэ көрө-билэ улаатан, толору сааһын ситээт да дьиэ кэргэн, оҕо-уруу тэринэр уонна икки эрэ илиитигэр бүүс-бүтүннүү эрэнэн икки мэндиэмэннээх дьиэ туттан киирбитэ.

Тыынар тыыннаах баарын тухары олох диэн учуутал, оттон киһи диэн сааһыттан тутулуга суох үйэлэргэ үөрэнээччи буоларын бэркэ билэн уонна ылынан туран ырааҕы уонна инникини быһа толкуйдуур биһиги уолбут Адыаччыны таһынан, чугас нэһилиэктэргэ тиийэ оттор уонна тутууга туттуллар мас кэрдиитинэн, тиэйиитинэн дьарыктаммыта. Аҕыйах сыл иһигэр бэйэ үлэ дьыалатын ситиһиилээхтик тэринэн араас кыра тиэхиньикэттэн саҕалаан улахаҥҥа тиийэ атыылаһан үлэтин өҥөтүн, ыырын өссө кэҥэтэн биэрбитэ. Кыра сааһыттан элбэх доҕордоох-атастаах Вячеслав Вячеславович өрөбүлэ суох үлэ үгэнигэр сылдьан билсэр, алтыһар дьоно сылтан сыл өссө элбиирэ.

Кытаанах санаалааҕа

Биир сааскы күн күрүлүүр күнүс олорор дьиэлэрэ оһохтон сылтаан ис өттө киһи сатаан олорбот курдук умайан хаалбыта. Оччолорго отут сааһын да туола илик киһи, дьиэ кэргэн баһылыга биир сайын иһигэр эрэллээх атастарын кытта улахан дьиэ туттубута. Эдэр ыал дьиэтин тиэргэнэ уруккутунааҕар өссө улахан, киэҥ уонна тупсаҕай көстүүлэммитэ.

Бастакынан…

2022 сыллаахха дойдуга байыаннай дьайыыга хомуур саҕаламмыта. Онно Адыаччы нэһилиэгиттэн ытык иэстэрин толоро барар уолаттартан кини биирдэстэрэ буолбута. Онно төгүрүк сыл устата сылдьарын тухары сөптөөх түгэн тосхойдоҕуна, кэргэнигэр, оҕолоругар эрийэн кэпсэтэрэ. Илиҥҥи байыаннай уокурук 5‑с гвардейскай холбоһуктаах сэбилэниилээх аармыйа 60‑с туспа мотострелковай батальонун штурмовой ротатын взводун отделениетыгар старшай стрелогунан сылдьыбыта.

2023 сыл сайыныгар иккис дойду оҥостубут Адыаччытыгар кылгас кэмҥэ кэлэ сылдьан, буолаары турар нэһилиэк баһылыгын быыбарыгар бэйэтин туруоруммута. Үрдүк эппиэтинэстээх киһи буоларын норуотугар көрдөрбүт уонна ханна баҕарар таһаарыылаахтык үлэлиирин дакаастаабыт киһи быһыытынан быыбарга мөккүөрэ суох кыайыылааҕынан тахсыбыта. Үрдүк дуоһунаска бастакы күннэриттэн бүттүүн нэһилиэккэ туһалаах сонун үлэлэри, сүүрээннэри киллэрэргэ толкуйдаабытынан, былааннаабытынан барбыта. Ол курдук, солбуйааччыта Саргылаана Стручкованы кытта күүстээх хамаанда тэринэн, нэһилиэк күннээҕи олоҕор-дьаһаҕар көрсөр кыһалҕаларын туоратарга киэҥ далааһыннаах үлэ саҕаламмыта.

Баһылык үлэтэ түбүктээх, сүүрүүлээх-көтүүлээх. Адыаччы нэһилиэгэ уонунан сыллар тухары биир сүрүн туруорсуутунан оскуола-уһуйааны уонна иккис киин хочуолунайы тутуу буолар. Эдэр баһылык Вячеслав Вячеславович ол олоххо түргэнник киирэрин туһугар үлэтин бастакы күннэриттэн араас көрсүһүүлэргэ, мунньахтарга эппитэ-тыыммыта элбэх. Хас биирдии ситиһиитин, кыра да хамсааһыны нэһилиэнньэҕэ кэпсиирэ, санаатын үллэстэрэ.

Сыл саҕаланыаҕыттан нэһилиэк, оройуон таһымнаах араас тэрээһиннэр, күрэхтэр ыытыллыбыттара. Норуот хайҕабылын ылыан ылбыт аҕа баһылыкпыт ааспыт 2024 сылга Адыаччы нэһилиэгэ төрүттэммитэ 100 сыллаах үбүлүөйүн тэрийбитэ. Нэһилиэгим туһа диэн, ыһыах ыытыллар ипподромун чөлүгэр түһэриигэ күүстээхтик ылсыбыта. Кылгас кэм иһигэр сиэрдийэ бэлэмнэнэн, суоруллан, ипподром ис-тас үлэтэ оҥоһуллан түмүктэммитэ. Болдьохтоох бириэмэҕэ, от ы??? 6йын 6–7 күннэригэр нэһилиэккэ өтөрүнэн буолбатах улахан, икки күннээх, баһаам элбэх дьон кыттыылаах үбүлүөйдээх ыһыах ыытыллыбытын дьон-сэргэ бэркэ диэн астыммыта.

Сэрэйбит курдук…

Байыаннай дьайыыттан ааспыт сылга хаста да кэлэ сылдьыбыта, бүтэһигин аҕа баһылыкпыт Адыаччытыгар балаҕан ыйыгар сылдьыбыта. Бу кэннэ тыыннаах эргиллибэтин сэрэйбит курдук, аҕыйах хонук иһигэр бөһүөлэк үлэтин-хамнаһын таһынан, бэйэтин дьиэтин-уотун ис-тас өттүн ситэ оҥоһуллубатаҕын тиһэҕэр диэри тиэрдибитэ. Нэһилиэк, оройуон, өрөспүүбүлүкэ кинини күүтэ хаалбыта…

2024 сыл ахсынньы 29 күнүгэр аҕа баһылыкпыт Вячеслав Слепцов сырдык тыына быстыбытын туһунан иһиллибитэ. Биир уопсай сүбэнэн бүттүүн оройуоҥҥа, нэһилиэккэ Саҥа дьыллааҕы тэрээһиннэр тохтотуллубуттара. Саҥа 2025 сыл маҥнайгы күннэригэр биллэриллибит кутурҕан күннэрэ ааспыттарын да кэннэ уһуга суох кутурҕан салҕанан бара турбут курдуга. Ол курдук, тохсунньу 22 күнүгэр оройуон киинигэр — Баатаҕай бөһүөлэгэр, онтон тохсунньу 24 күнүгэр Адыаччыга быраһаайдаһыылар кэннэ тохсунньу 25 күнүгэр төрөөбүт Алыһардааҕын сиригэр-буоругар суолун сабар хаар түһүүлээх кистэммитэ.

Отут икки эрэ сааһыгар олохтон туораабыт Вячеслав Слепцов бүттүүн дойдуга, өрөспүүбүлүкэҕэ, оройуоҥҥа, нэһилиэккэ байыаннай дьайыыга сылдьан дьоруойдуу охтубут аҕа баһылык буолбута. Бүтүн Арассыыйатааҕы “Служение” II муниципальнай бириэмийэҕэ киирбит 41313 сайабылыанньаттан Саха сириттэн кини талыллан номинант буолбута. Оройуон, нэһилиэк көҕүлээһиннэринэн, кини сырдык кэриэһигэр олунньу 21–23 күннэригэр номнуо иккис төгүлүн оройуоннааҕы “Эдэр хоһуун кууруһа” диэн оскуола саастаах оҕолорго байыаннай-полевой хомуур ыытыллара былааннанна. Бу тэрээһин 2024 сыл балаҕан ыйын 9–10 күннэригэр аҕа баһылыкпыт Вячеслав Слепцов көҕүлээһининэн ыытыллыбыта. Ону таһынан, быйыл муус устарга эмиэ кини сырдык кэриэһигэр анаан оройуон олохтоох дьаһалталарын күүстээх, быһый, сымса үлэһиттэригэр аан бастакытын спартакиада ыытыллыаҕа.

Дьааҥы сирэ Дьоруойдарын умнубат! Күн бүгүнүгэр диэри Адыаччы дьоно-сэргэтэ ытыктыыр, Улуу Кыайыы искибиэригэр өйдөбүнньүк тааһа турар Аҕа дойду Улуу сэриитигэр кыттыыны ылбыт буойун Чириков Константин Васильевич диэн соҕотох дьоруойдаахпыт. Аны кинини сэргэ нэһилиэк, оройуон, өрөспүүбүлүкэ, Бүтүн Арассыыйа киэн туттар киһитэ, биир дойдулаахпыт Слепцов Вячеслав Вячеславович аата иккис Дьоруой быһыытынан ааттаныа.

Константин КАЖЕНКИН, СӨ Суруйааччыларын сойууһун чилиэнэ, уопсастыбаннай кэрэспэдьиэн.