Дьааҥы өрүс арыытыгар дьон хаайтарбыт

Бүгүн, муус устар 22 күнүгэр, Дьааҥы улууһугар икки киһи Дьааҥы өрүс арыытыгар көмө күүтэрин туһунан иһитиннэрии киирбит. «УАЗ- Хантер» мааркалаах массыына мууска хаайтарбыт.

Саха сирин Быыһыыр сулууспата иһитиннэрэринэн, массыына Уус Куйгаттан Баатаҕай айанныыр суолга хаайтарбыт. Икки киһи арыыга тахсан координаттарын ыйбыттар. Биэдэмистибэҕэ бэлиэтээбиттэринэн, дьон сылаас таҥастаахтар, онон суһал көмөҕө наадыйбаттар. Кинилэри көмө оҥорууга Батаҕайтан вездеходунан доҕотторо айаннаабыттар.

Санаттахха, Саха сирин киин оройуоннарынан муус үрдүнэн айан-сырыы барыта тохтотуллубута. Мууска тахсыы кытаанахтык бобуллар. Оттон Арктика уонна хоту оройуоннарынан кыһыҥҥы өрүс үрдүнэн суоллары муус устар 25 күнүгэр диэри сабыллаллара былааннанар.