Дьааҥы педагогтара 4,5 киилэлээх арбуустары үүннэрэллэр 

Дьааҥы улууһун педагог идэлээх ыала быйыл 4,5 киилэ ыйааһыннаах арбуустары хомуйдулар.

Бала сэлиэнньэтин оскуолатын педагогтара Наталья, Петр Слепцовтар өссө 1990-с сыллартан сайыҥҥы сынньалаҥнарыгар оҕуруот аһын арааһын олордоллор. Онтон алтыс сылын сөбүлээн үүннэрэн, быйыл 4,5 киилэлээх хас даҕаны арбууһу хомуйдулар. Арбууһу үүннэрии кистэлэҥэ тугуй диэн ыйытыыбар: “Туох кистэлэҥэ кэлиэй. Муус устартан арассаадалыыбыт. “Сахарный малыш”, “Шуга Бейби”, “Астраханскай”, “Кримсон” диэн суортары олордобут. Биир укка иккилии аһы хаалларабыт, сороҕо тахса-тахса өлөн иһэллэр. Тэпилииссэбит оһохтоох, онон тулуһаллар. Быйылгы арбуустарбыт бары ортотунан 4,5 киилэ курдук ыйааһыннаахтар”, – диэн кылгастык кэпсииллэр.

Ити курдук, педагог идэлээх ыал сыллата сайыҥҥы сынньалаҥнарыгар куораттан тиийэр сиэннэрин бэйэлэрэ үүннэрбит, кытарчы буспут арбуустарынан күндүлүүллэр. Маны таһынан, оҕурсу, хаппыыста, батун луук, укуруоп, уо.д.а. курдук киэҥник тарҕаммыт оҕуруот аһын хото олордон, номнуо кыһыҥҥы хаһаастарын бэлэмнээн олороллор.