Дьааҥы улууһугар баһаартан сылтаан булт сезонун тохтоттулар

СӨ экологияҕа министиэристибэтэ Дьааҥы улууһугар ойуур баһаардарыттан уустук балаһыанньа буолбутунан сибээстээн, булт сезонун тохтотор туһунан быһаарыныыны ылынна. Докумуон сөбүлэһиигэ сылдьарын туһунан СӨ Ил Дарханын уонна Бырабыыталыстыбатын дьаһалтатын пресс-сулууспата иһитиннэрэр.

«Ааспыт өрөбүллэргэ, хомойуох иһин, Дьааҥы улууһугар буола турар балаһыанньа уларыйбата. Булт саҕаланнаҕына саҥа уот күөдьүйүүтэ өссө элбиэн сөп. Бу быһаарыныыны Эбээн Бытантай улууһугар эмиэ ылыныах курдуктар», — диэн бастакы вице-премьер Дмитрий Садовников иһитиннэрэр.

Билиҥҥи туругунан, Дьааҥыга 7 ойуур баһаара уонна 15 ландшафтнай баһаар баара биллэр. Бу төрүөттэринэн дьон сири өртөөбүттэрэ буолар. Манна 200-чэ киһи баһаары умуруорууга үлэлиир.