Дьааҥы улууһугар эмчиттэри үөрэ-көтө көрүстүлэр

Алтынньы 10 күнүгэр Дьокуускай куораттан быраастар биригээдэлэрэ Дьааҥыга үлэлии тиийдэ. Биригээдэҕэ 12 исписэлиис, ол иһигэр терапевт, травматолог-ортопед, педиатр, невропатолог, эндокринолог, кардиолог, пульмонолог, лор уонна ультразвуковой диагностика быраастара бааллар.

“Биһиги мобильнай биригээдэ быраастара, манна салгыы үлэлииргэ бэлэммит. Олохтоохтор, уруккуларын курдук, олус истиҥник көрүстүлэр, биһигини улахан үлэ күүтэр”, — диэн биригээдэ салайааччыта, терапевт-быраас Татьяна Дьячковская иһитиннэрдэ. Санатан суруйдахха, бу биригээдэ балаҕан ыйыгар Дьааҥы ыраах сытар нэһилиэнньэлээх пууннарыгар тиийэн, чахчыта да үрүҥ халааттаах аанньал буолбуттара, нэһилиэнньэ махталын ылбыттара.

Быраастар бүгүн Токума нэһилиэгин олохтоохторун доруобуйаларын көрүөхтэрэ-истиэхтэрэ. Кинилэр үс нэдиэлэ устата Токума, Боронук, Алыһардаах, Табалаах, Бөтөҥкөс, Боруулаах, Эһэ Хайа, Үүттээх, Остуолба уонна Баатаҕай нэһилиэктэригэр үлэлиэхтэрэ.

Манна миэстэтигэр уопсай анаалыстары сэргэ, онкомаркерга, саахарга, холестериҥҥа, онкоцитологияҕа анаалыстары уо.д.а. ылыахтара. Диспансер кэтээн көрүүтүгэр сылдьар эмтэнээччилэри иккистээн сыныйан көрүөхтэрэ.