Дьааҥы ыччаттара бэйэлэригэр эрэллээхтэр

«Муус устар» бэстибээл тыа хаһаайыстыбатын сайыннарыы хайысхатыгар Дьааҥы улууһун ыччаттара тэҥнээхтэрин булбатылар, бары көрүҥнэргэ инники күөҥҥэ тахсан, бастаатылар.

Ыччаттар «Өрөгөй» успуорт комплексыгар ыытыллыбыт суолталаах тэрээһиҥҥэ ох курдук оҥостон кэлбиттэр. Ол курдук, тыа хаһаайыстыбатын министиэристибэтиттэн саха оҕуһун чуучулатын макетын уларсан аҕалан туруорбуттар.  Кэлбит дьону убаһа сыатынан, тууһаммыт  балыгынан, биэ кымыһынан  күндүлээтилэр.

 М.К. Аммосов аатынан ХИФУ ФЭИ 2-с кууруһун устудьуна Христина Ефимова Дьааҥы улууһун 8 киһилээх хамаандатыгар киирсэн кытынна.

— Үс күнү быһа хамаандабыт тыа хаһаайыстыбатын министиэристибэтиттэн харыс да халбарыйбакка үлэлээтэ.  Бастакы күн тест толорбуппут. Онно экэниэмикэ, зоотехник, технолог идэлэргэ туһаайыллыбыт боппуруостарга хоруйдаабыппыт. Иккис күҥҥэ биисинэс-былааммытын көмүскээбиппит.  Мин экэниэмикэ боппуруостарыгар хоруйдаабытым. «Муус устар» бэстибээлгэ быйыл иккис кыттыым. Эмиэ тыа хаһаайыстыбатын хайысхата этэ. Онон биллэ уопутурдум. Биллэн турар, мин идэбин баһылыырбар бу тэрээһин төһүү күүһүнэн буолар, элбэҕи биэрэр, — диэн санаатын үллэһиннэ хамаандатыгар кыайыыны уһансыбыт төрөөбүт Дьааҥытын патриота  Христина Ефимова.

Дьааҥы кэскиллээх ыччаттарыгар өссө да чаҕылхай ситиһиилэри баҕарабыт!