Дьааҥыга хорсун хайыһардьыттар айаннара 80 сылын туолла

Дьааҥы улууһугар номоххо киирбит сэттэ чулуу хайыһардьыта 1945 сыллаахха 2236 км усталаах Дьааҥы — Дьокуускай — Дьааҥы хайысханан айаннара бу сыл олунньу 15 күнүгэр 80 сылын туолла.

1945 сыллаахха Ленинград блокадатын босхолооһуҥҥа анаан Дьааҥытааҕы баартыйа райкомун кэмитиэтэ «Тулууру бэрэбиэркэлээһин» диэн соруктаах 2236 км уһуннаах Дьааҥы — Дьокуускай — Дьааҥы маршрутунан сэттэ хайыһардьыт хомсомуол ыччаты айанныырыгар сорудахтаабыта.

Онуоха лейтенант Романов салалтатынан оройуон иһинээҕи хайыһарынан сүүрүүгэ хандьыдааттары сүүмэрдииргэ араас хайыһарынан күрэхтэһиини уонна сүүрүүнү саҕалаабыта. Түмүгэр уонтан тахса чулуу спортсменнартан сэттэ хорсун эдэр дьон талыллыбыттара.

Сиэгэн Күөлтэн төрүттээх, этэрээт хамандьыыра, хомсомуол сэкирэтээрэ — Николай Неустроев, күнү-дьылы кэтээн көрөөччүлэр — Николай Баишев, Александр Афанасьев, нэһилиэк сэбиэтин сэкирэтээрэ Петр Климовскай, ааҕар балаҕан сэбиэдиссэйэ — Николай Слепцов, ОСОАВИАХИМ үлэһитэ — Гаврил Обутов уонна милииссийэ үлэһитэ Иннокентий Слепцов олунньу ыйга томороон тымныылар саҕана баартыйа сорудаҕын толоро айаннаабыттара.

Дьокуускай куоракка Дьааҥы хайыһардьыттара 1945 сыллаахха кулун тутар 2 күнүгэр кэлбиттэрэ. Онно сынньанан баран, хайыһардьыттар өссө күрэхтэһиилэргэ кыттыбыттара биллэр. Ол кэннэ 16 хонук устата айаннаан, Дьааҥы куоракка хайыһар сүүрүүтүн ситиһиилээхтик түмүктээбиттэр.