Дьааҥыга патриоттар пуорумнарыгар хоһоон куонкуруһа буолла

Бу күннэргэ Дьааны улууһугар оройуоннааҕы патриотическай пуорум буолан ааста.

Суолталаах тэрээһин чэрчитинэн «Хоһоонунан дьоруойдары уруйдуубун» диэн куонкурус дьон болҕомтотун тарта. Бу туһунан Баатаҕайдааҕы алын сүһүөх кылаас учуутала Анна Стручкова маннык сырдатта:

«Улуус бары нэһилиэктэриттэн кэлбит 23 кыттааччы  ис дууһаларыттан иэйэн туран ааҕаннар, барыбытын долгуттулар. 

Кыайыылаахтарынан буоллулар: 1 миэстэ — Арыылаахтан култуура үлэһитэ Олег Домнин. Кини  «В землянке» хоһоону аахта. 2 миэстэни Нина Тихонова «Баллада о матери» ааҕан ылла. Үһүс миэстэ Полина Домнина буолла. Кини «Зоя» хоһоону аахта.

Хамаанданан түмүккэ Арыылаах нэһилиэгэ бастаата. Иккискэ — остуолбалар, үһүскэ — Янскай нэһилиэгэ. Дьоммут өрүү маннык түмсүүлээх буолан, Улуу Кыайыы 80  сыллаах үбүлүөйүн бары тэрээһиннэригэр көхтөөхтүк кытталлар,  онтон олус үөрэбит. Бу тэрээһини  бэлэмнээн ыыппыт көхтөөх дьоммутугар, бэтэрээннэргэ барҕа махталбытын тиэрдэбит.