Дьааҥыга полицейскайдар массыына күрэтээччини туттулар

Дьааҥы улууһун полициятын дьуһуурунай чааһыгар олохтоох ыал массыыналарын күрэппиттэрин туһунан тыллаабыттар.

Силиэстийэ быһаарыытынан, эмсэҕэлээччи эр киһи дьиэтин иннигэр «Toyota Corona» мааркалаах массыынатын туруорбут. Сарсыарда эрдэ туран массыынатын миэстэтигэр булбатах.

Суһал-көрдүүр дьаһалларынан  холуобунай ирдэбил үлэһиттэрэ уорбаланааччыны туппуттар. Урут сууттана сылдьыбыт 20 саастаах эдэр киһи буолара биллибит.

Силиэстийэ быһаарыытынан, эдэр уорбаланааччы дьиэтигэр төннөн иһэн  күлүүстээх массыынаны  бэлиэтии көрбүт. Массыына түннүгүн алдьаппыт уонна күрэтэн илдьэ барбыт. Уорбаланааччы нэһилиэк устун хатааһылаабыт уонна дьиэтиттэн чугас тырааныспары быраҕан барбыт. Холуобунай дьыала тэрилиннэ. Уорбаланааччы 5 сылга диэри көҥүлэ быһыллыан сөп. Бу туһунан ИДьМ пресс-сулууспата суруйар.