Бу күннэргэ Сунтаар улууһун нэһилиэктэригэр Төрөөбүт төрүт тыл сылын иитинэн араас тэрээһиннэр буола тураллар. Улуус дьаһалтатыттан уонна култуура, үөрэҕирии салааларыттан анал бөлөх тэриллэн, нэһилиэктэринэн айан саҕаланна.
Дьаархан нэһилиэгэр үүммүт сылы уруйдуур тэрээһиҥҥэ кырачаан оҕолортон саҕалаан, ытык кырдьаҕастарга тиийэ тоҕуоруһа муһунна. Мустубут дьону толору сахалыы астаах-үөллээх сандалыны бэлэмнээн, тута миэстэтигэр алгыстаах алаадьыны астаан, үөрэ көрүстүлэр. Лариса Иванова — Ырыа Дьаархан бар дьонун арчылаан, унаар буруону таһааран, алгыс баһын сыалаата.
Дьоҕус нэһилиэк дьоно-сэргэтэ төрөөбүт тылга болҕомто ууруллубутун үөрэ иһиттилэр. Кинилэр төрүт үгэһи сөҕүрүппэккэ баччааҥҥа диэри иҥэринэ сылдьар нэһилиэктэртэн биирдэстэрэ. Ол курдук, уһуйааҥҥа, оскуолаҕа уонна ыччаттарга аналлаах фольклор уонна саха үҥкүүтүн куруһуоктара ситиһиилээхтик үлэлииллэр.
«Күн оһуохай» бырайыак чэрчитинэн, республикатааҕы оҕо лааҕырыгар улуустан 12 оҕо талыллан барбытыттан 7-тэ Дьаархантан. Ааспыт сылга «Кэрэ ситим» үҥкүү ансаамбыла ыччаттарга ананан тэриллэн, номнуо улуустааҕы Олоҥхо күрэҕэр бастакы миэстэни ситиспиттэрэ. Быйыл Дьокуускайга ыытыллыахтаах Дархан этээччи Моисей Иванов аатынан оһуохай күрэҕэр, бүтүн нэһилиэгинэн көһөн барар былааннаахпыт дииллэр.
Нэһилиэнньэ олус көхтөөхтүк, сэргэхтик дьаһанан олорор. Күн ахсын спорт саалатыгар ортотунан 60-ча киһи мустан сахалыы остуол оонньууларыгар, теннискэ, городкига, бильярдка дьарыктаналлар.
Үүнэр көлүөнэ сахалыы ыраастык саҥарар, булкуйан саҥарааччы ахсааннаах. Бэл диэтэр, төрүөхтэриттэн сүрэхтэммит нууччалыы ааттарын сахалыы аакка уларыппыт 2 киһи баар. Ону тэҥэ, ааспыт сылга, күн сирин көрбүт кырачаан киһини Эрэл-Эркин Уйбаан Уола диэн ураты сахалыы аатынан сүрэхтээбиттэр.
«Ийэ диэн истиҥник, ийэ тылбын иҥэрэбин» диэн сыл бэлиэтин, чуорааны тутан, үүммүт сылга тустаах үлэ ыытыллыаҕа. Сэргии истибиппит диэн, түөлбэлэр икки ардыларыгар спартакиада саҕаламмыт. Манна араас таһымнаах күрэхтэргэ киирсиэхтэрэ. Кыайыылаахтар 100 тыһ.солк. наҕараадаланыахтара.
Сунтаар улууһун дьаһалтатын пресс-сулууспата
"Аҕа дойдуну көмүскээччилэр" пуонда филиала байыаннай дьайыы бэтэрээнэ Юлиан Смогайлов "Транснефть-Восток" бөдөҥ бырамыысыланнай хампаанньаҕа үлэҕэ…
Бу күннэргэ саамай кылгас, хараҥа, тымныы күннэр тураллар. Аҕыйах хонон баран, күммүт кутуйах хаамыытынан уһаан…
Ахсынньы 19 күнүгэр түүн Дьокуускай куоракка Ленин проспегар турар дьиэ биир кыбартыыратыгар уот турбут. Буруонан…
Арассыыйа Бэрэсидьиэнин Владимир Путин быһа лииньийэни кытта холбоһуктаах улахан пресс-кэмпириэнсийэтэ Москваҕа Гостинай дворга буолуоҕа. Бу…
Кэлэн иһэр саргылаах Саҥа дьылынан ытык-мааны сахам дьоно! Уһук хоту дьааҥы үрэх үрдүгэр турар Усуйаана…
Саха сирин экологияҕа министиэристибэтин сылы түмүктүүр мунньаҕар “Зеленый четверг” экология бырайыагын тэнитиигэ стратегическай сиэссийэ буолла.…