Дьахтар 1,6 мөл. солк. тахса алимент иэһин кыбартыыраны атыылаан төлөстө

Саха Өрөспүүбүлүкэтин суут бириистэптэрин сулууспатын управлениетыгар икки сааһын ситэ илик оҕотун иитиитигэр алименнары төлөөбөтөх дьахтар дьыалата көрүллүбүт.

Дьокуускай куорат олохтооҕо уһун кэм устата төрөппүт эбээһинэһин толоруутуттан куотунан сылдьыбыт. Дьахтар ханна да үлэлээбэт, дохуота суох эбит, ол түмүгэр алимент иэһэ 1,6 мөл. солк. тахса буолбут. Саастарын ситэ илик оҕолор бырааптарын уонна сокуоннай интэриэстэрин көмүскүүр сыалтан, суут бириистэбэ харчыны ирдиир тэрээһиннэри ыыппыт. Ол курдук, дьахтар бааҥҥа счеттара, хамсаабат баайы-дуолу атыылыыра хааччахтаммыт, ону таһынан кыраныысса таһыгар тахсара быстах кэмҥэ бобуллубут. Итиэннэ, дьахтар алимены төлөөбөт дьон «хара испииһэгэр»  киллэриллибит. Түмүгэр дьахтар кыбартыыратын атыылаан, алимент иэһин толору төлөөбүт диэн СӨ Суут бириистэптэрин  пресс-сулууспата иһитиннэрэр.