Дьахтар аҕатын ытык мэтээллэрин атыылыы сатаабыт

39 саастаах дьахтар аҕатыгар биллэрбэккэ эрэ интэриниэт былаһааккаҕа сэттэ устуука судаарыстыбаннай наҕарааданы, ол иһигэр «ССРС Үлэтин бэтэрээнэ», «Килбиэннээх үлэтин иһин» уонна «Сэрии оҕолоро» мэтээллэри атыылыыр туһунан биллэриини таһаарбыт.

Биллэриитинэн ким эрэ интэриэһиргээбитигэр, кини атыылаһааччыны кытта Дьокуускай аэропордугар көрсөргө болдьоспут. Ол эрээри, буруйданааччы хара дьайыытын ситэрбэтэх. Кинини атыылаһааччы буолан сылдьар  тырааныспар полициятын үлэһитэ туппут.

Билиҥҥи туругунан, Арассыыйа ИДьМ сулууспатын Хотугулуу-Илиҥҥи тырааныспарга линейнэй управлениета силиэстийэлиир отделын силиэдэбэтэллэрэ РФ ХК 324-с ыстатыйатынан тэрийбит холуобунай дьыалата Дьокуускайдааҕы тырааныспарга борокуруора бигэргэппит буруйдуур түмүгүнэн мировой суукка ыытылынна.

Буруйданааччыга ханна да барбат уонна бэрээдэги кэспэт туһунан илии баттааһын хаарчахтыыр миэрэтэ ылылынна, диэн СӨ Тырааныспарга полициятын пресс-сулууспата иһитиннэрэр.