Дьахтар бэстилиэт уорбут уонна гостиница администраторын куттаабыт

2025 сыл бэс ыйын 8 күнүгэр Дьокуускай куорат биир гостиницатыгар быһылыын буолбут. 1993 сыллаах төрүөх дьахтар итирэн баран, түүн баарга билсибит эр киһититтэн бэстилиэт уорбут. Бу туһунан СӨ Сууттарын холбоһуктаах пресс-киинэ иһитиннэрэр.

Бастаан дьахтар көрдөһүүтүнэн, эр киһи бэйэтин 2022 сыллаахха Росгвардия көҥүлүнэн ылбыт МР-80-13Т калибрдаах 45 Rubber диэн бэстилиэтин көрдөрбүт. Ол кэннэ бэстилиэтин хаҕыгар уган баран утуйан хаалбыт.

Дьахтар арыгы тутуурдаах хайдах гостиницаҕа баар буолан хаалбытын, туох буолбутун билээри видеокамераны көрөөрү администраторга тиийбит. Администратор аккаастаабытыгар, дьахтар ирдэбили толотторор баҕаттан соруйан администратор төбөтүгэр бэстилиэти туһаайан өлөрөрүнэн куттаабыт.

Онтон көмөҕө кэлбит иккис үлэһити бэстилиэтинэн туһаайан куттаабыт. Эр киһи өлөрүө суоҕа диэн куттаммакка, ыксаллаах (тревожнай) кунуопканы баттаабыт.

Дьахтар кэлин аанынан күрүү сатаабыт эрээри, быһылаан буолбут сириттэн чугас Росгвардия үлэһиттэрэ тута туппуттар.

Бу дьахтарга РФ Холуобунай кодексатын 226-с ыстатыйатын 1-кы чааһынан (саа сэбин уоруу) уонна 213-с ыстатыйатын 2-с чааһынан (саа сэбин туттан күлүгээннээһин) холуобунай дьыала тэриллибит.

Холуобунай дьыаланы көрбүт Дьокуускай куорат суута сууттанааччы күлүгээннээһиҥҥэ буруйдааһына РФ Холуобунай кодексын 119 ыстатыйатын 1 ыстатыйатын 1 чааһыгар олоҕурбут буруйу оҥоруу (өлөрүүнэн куттааһын эбэтэр доруобуйаҕа ыарахан хоромньуну оҥоруу) буоларынан ааҕыллар диэн түмүккэ кэлбит. Суут өрүттэр эйэлэспиттэринэн, бу ыстатыйанан холуобунай эккирэтиини тохтоппут.

Суут кэмигэр дьахтар бэстилиэти уорбутун билиммэтэх, билсибит киһитэ бэйэтэ биэрбитэ диэн эппит. Ол гынан баран суут, холуобунай дьыалаҕа хомуллубут уонна суукка бэрэбиэркэлэммит дакаастабыллары барытын учуоттаан, 4 сылга көҥүлүн быһары усулуобунайынан ааҕан, 1 сыл тургутар болдьоххо уурбут. Бу кэм иһигэр кини сиэрдээхтик сылдьарын дакаастыахтаах.

Буруйданаччы сааһын, үлэлиир кыаҕын уонна доруобуйатын учуоттаан, киниэхэ маннык эбээһинэстэр сүктэриллибиттэр: усулуобунай сууттаммыт киһини хонтуруоллуур анал судаарыстыбаннай уоргаҥҥа учуокка туруу; анал судаарыстыбаннай уоргаҥҥа биллэрбэккэ дьиэтин аадырыһын уларыппат буолуу; биир ыйга биирдэ ыйыллыбыт уоргаҥҥа бэлиэтэнэ кэлии.

Бириигэбэр сокуоннай күүһүгэр киирэ илик.