Дьахтартан билэр эр киһитэ 120 тыһ.солк. харчыны уорбут

ИДьМ 2 №-дээх полициятын отделыгар олохтоох дьахтар баанын счетуттан 120 тыһыынча солкуобайы уорбуттарын туһунан тыллаабыт.

Суһал-ирдиир  тэрээһиннэринэн холуобунай ирдэбил үлэһиттэрэ урут сууттана сылдьыбыт  Үөһээ Бүлүү оройуонун 37 саастаах олохтооҕун туппуттар.

Силиэстийэ быһаарыытынан, уорбаланааччы билэр дьахтарыгар хоноһулуу хаалбыт эбит. Сарсыарда эрдэ уһуктан туран,  эр киһи дьахтар баанын каартатын сытарын бэлиэтии көрбүт. Эрдэ дьахтар уурунуу харчылааҕын уонна баан каартатын пин-кодун билэр буолан, каартаны уоран ыларга санаммыт. Каартаны уоран баран, эр киһи чугастааҕы банкомакка тахсан, 120 тыһыынча солкуобайы устубут. Уорбут харчытын тус наадатыгар уонна арыгы атыылаһарга ороскуоттаабыт.

Силиэстийэ кэмигэр уорбаланааччы урут эмиэ дьахтартан икки төгүл кыһыл көмүс киэргэлин уоран сууттана сылдьыбытын быһаардылар. Ол эрээри, дьахтар эр киһини кытта бодоруһарын тохтоппотох.

Холуобунай дьыала тэрилиннэ. Буруйдаах эр киһи 6 сылга диэри болдьоххо көҥүлэ быһыллыан сөп.