Дьахтар кигиитинэн дьиэҕэ киирэн кырбаабыттар, халаабыттар

Нам улууһун Аппааны нэһилиэгэр 27 саастаах эр киһини түүн дьиэтигэр киирэн кырбаабыттар уонна көмпүүтэрин былдьаан тахсыбыттар.

Эр киһи полицияҕа үҥсүбүт. Онно биллибитинэн, саба түһүү иннинэ үс эр киһи билэр кыыстарын көрсүбүттэр. Онуоха кыыс сылдьар уола киниэхэ куһаҕан сыһыаннааҕын үҥсүбүт. Эр дьон кыыс уолун кэһэтэн биэрээри, түүннэри дьиэтигэр тиийбиттэр.  Саба түһээччилэртэн икки эр киһи ыаллыы сытар нэһилиэк олохтоохторо буолаллар, үһүс киһилэрэ — Дьааҥы улууһуттан төрүттээх, эрдэ сууттана сылдьыбыт киһи.

Уорбаланааччылары Дьокуускайга  туппуттар, уоруллубут системнай блогу булбуттар. РФ холуобунай кодексатын 161  ыст. 2 ч.»Халааһын» диэнинэн холуобунай дьыала тэриллибит.

Бу туһунан ИДьМ пресс-сулууспата  иһитиннэрэр.