Дьахтар консультациялара аныгы тэриллэринэн хааччыллыахтара

Өрөспүүбүлүкэ Алдан, Хаҥалас, Ньурба улуустарыгар быйыл дьахтар консультациятын үс кэбиниэтэ аһыллыаҕа. Аныгы тиэхиньикэлэрэ «Дьиэ кэргэн» национальнай бырайыагынан хааччыллаллар.
Арассыыйа араас эрэгийиэннэригэр 2030 сылга диэри 300-тэн тахса дьахтар консультацията тэриллиэҕэ, бастатан туран, тыа сиригэр, куорат тииптээх нэһилиэнньэлээх пууннарга, кыра куораттарга аһыллыахтара. Бу дьахтар доруобуйатын кэбиниэттэрэ сыл бүтүөр диэри Алдаҥҥа, Покровскайга, Ньурбаҕа аһыллан үлэлиэхтэрэ.
СӨ Доруобуйа харыстабылын министиэристибэтин кылаабынай акушер-гинеколога Лилия Анкушева иһитиннэрбитинэн, өрөспүүбүлүкэ киин куоратыттан төһө тэйиччи буоларын уонна хааччыйар нэһилиэнньэ ахсаанын учуоттаан, талыллыбыттар.
Киин учаастактааҕы балыыһаларга баар акушер-гинеколог кэбиниэттэрин баазатыгар аныгы тэриллэринэн толору хааччыллыбыт дьахтар консультациялара тэриллэн эрэллэр. Кинилэри саҥардыыга 80 мөлүйүөнтэн тахса солкуобай көрүллүбүт, онон 200-тэн тахса мэдиссиинэ тэриллэрин атыылаһар кыах баар буолуоҕа.
Тыа сирин дьахталлара исписэлиистэргэ сылдьалларыгар, төрүүр-ууһуур доруобуйаларын бэрэбиэркэлэнэллэригэр табыгастаах буолуоҕа. Ол гынан баран, саҥа сулууспалар үрдүк таһымнаах техническэй тэриллэри эрэ буолбакка, үлэлэригэр саҥа ньымалары эмиэ көрдөрүөхтэрэ.
Сообщить об опечатке
Текст, который будет отправлен нашим редакторам: