Дьахтар кыыс оҕотун кыптыыйынан өлөрө сатаабыт

Дьокуускай куорат 53 саастаах олохтооҕо дьахтар кыыс оҕотун тимир кыптыыйынан төбөҕө, моонньуга, илиигэ барыта 14-тэ саайбыт. Бу туһунан СӨ Борокуратууратын пресс-сулууспата иһитиннэрэр.

Быһылаан 2024 сыл сэтинньитигэр күнүс буолбут. Дьахтар бэйэтин кыбартыыратыгар итирик туруктаах сылдьан, кыыһын кытта этиспит. Онтон кыптыыйы ылаат, кыыска саба түспүт.

Кыыс утарылаһан эрэ тыыннаах хаалбыт, этигэр-сиинигэр аһаҕас эчэйиилэри ылбыт. Итиэннэ кырыктаах ийэ кыыһын 13-тэн итэҕэһэ суохтук тэбиэлээбит.

Өлөрөргө сааммытын иһин бу дьахтарга холуобунай дьыала тэрилиннэ. Буруйун толору билиммит. Суут кинини алта сылга уопсай эрэсиимнээх холуонньаҕа көҥүлүн быһарга уураахтаабыт.