Дьахтар сахалыы таҥаһа төһө сыаналаах буоларый?

Ыһыаҕы дьон бары, улаханныын-кыралыын, долгуйа күүтэллэр. Дьахталлар ыһыахха  сылы  быһа  бэлэмнэнэн, халадаай ырбаахы тиктэрэллэр, сахалыы атах таҥаһын, илин-кэлин кэбиһэри, бастыҥаны атыылаһаллар, биитэр сакаастаан оҥортороллор. 

Дьахтар сахалыы таҥаһын сыаната  төһө буолара буолуой? Бу күннэргэ Дьокуускай куоракка араас маҕаһыыннары кэрийэн, сыананы  үөрэтэн баран, маннык түмүккэ кэллим.

Халадаай: сыаната матырыйаалыттан уонна быһыытыттан-таһаатыттан тутулуктаах. Саамай боростуой халадаай 6-8 тыһыынчаттан саҕаланар, биллэр дизайнердар халадаайдарын 60-70 тыһыынчаҕа да атыылыыллар эбит. Холобур, «Хотой Бренд» маҕаһыыҥҥа быйыл саамай сыаналаах халадаайы 25 тыһыынчаҕа атыыласпыттар. Онон, халадаай орто сыаната — 12-16 тыһыынча диэн буолла.

Сахалыы киэргэллэр: үрүҥ көмүс илин кэбиһэр сыаната 37 тыһыынчаттан саҕалаан 200-тэн тахса тыһыынчаҕа тиийэр эбит.  Көннөрү тимиртэн оҥоһуллубут  илин кэбиһэр лаппа чэпчэки – 2-3 тыһыынча буолар.  Бастыҥа сыаната 30-90 тыһыынчаҕа, бөҕөх – 45-90 тыһыынчаҕа тиийэр.  Үрүҥ көмүс ытарҕа сыаната 3 тыһыынчаттан саҕаланар.

Атах таҥаһа:  Саха сиригэр кэлиҥҥи сылларга сахалыы моһуоннаах дьахтар, эр киһи саппыкытын  тигэн атыылыыр буоллулар. Онтубут сыаната араастаһар.  Сыаната ортотунан 10 тыһыынча буолар эбит. Онтон «экокожаттан» оҥоһуллубут  дьахтар саппыкыта  быдан чэпчэки – 4500  солк.

Бу курдук, саха дьахтарын танаһа сүрдээх сыаналаах буолан тахсар. Баһыттан атаҕар диэри таҥнар буоллаҕына, уопсайа 150 тыһ. солк. тахса  наада курдук диэн суоттаатыбыт.

Ушатова Нарыйаана.