Дьахтарга өстүйдэҕэ аатыран …

Урут бииргэ олоро сылдьыбыт дьахтарын массыынатын алдьаппыт киһини холуобунай ирдэбил үлэһиттэрэ туппуттар.

Дьокуускайга 1 №-дээх полиция отделын дьуһуурунай чааһыгар дьахтар сайабылыанньа суруйан киллэрбит. Түүн кини «Тойота Аллион» массыынатын ким эрэ алдьаппытын туһунан быһаарбыт.

Холуобунай ирдэбил үлэһиттэрэ суһал-ирдиир үлэлэрин түмүгүнэн, бу дьахтар урут бииргэ олоро сылдьыбыт киһитэ (42 саастаах) буоларын быһаарбыттар.

Ол курдук, уорбаланааччы итирэн баран, массыына ойоҕос аанын уонна багажнигын тэбиэлээн алдьаппыт. Кини бу дьахтары сөбүлээбэккэ, өстүйдэҕэ аатыран итинник быһыыламмытын эппит.

РФ Холуобунай кодексатын 167 ыст. 1 ч. («Умышленные уничтожение или повреждение имущества») холуобунай дьыала тэриллибит.

СӨ ИДьМ пресс-сулууспата