Дьахтарга саба түспүт алабай хаһаайынын буллулар

Саҥа дьыл кэнниттэн «Үрдэл» сынньалаҥ пааркаҕа дьахтарга алабай боруодалаах ыт саба түһэн улаханнык эчэппитэ.  Уһун кэм устата бу алабай хаһаайынын көрдөөбүттэрэ.

Ыты «Помоги выжить» пууҥҥа аҕалан туттарбыттара. Пууҥҥа да туран, ыт ырдьыгыныыр диэн иһитиннэрэн тураллар. Бүгүн, олунньу 6 күнүгэр,  Дьокуускай куорат дьаһалтатын уопсай мунньаҕар СӨ бэтэринээрийэҕэ департаменын  бэрэстэбиитэлэ иһитиннэрбитинэн, алабай хаһаайына көстүбүт. Онон дьыала силиэстийэлиир уорганнарга тиэрдиллибит.

Маны сэргэ, куорат үрдүнэн бэйдиэ сылдьар ыттары тутууга уопсайа сэттэ биригээдэ үлэлиир эбит. Ааспыт нэдиэлэ түмүгүнэн уопсайа 75 ыты туппуттар. Сыл саҕаланыаҕыттан 314 ыт тутуллубут. Билигин пууҥҥа 1277 ыт баара бэлиэтэнэр.