Дьахтарга саба түспүт алабай пуун үлэһиттэригэр кутталы үөскэппит

«Үрдэл” пааркаҕа ыт бэҕэһээ дьахтарга саба түспүтүн туһунан суруйбуппут. Ыты суһаллык кыылы быстах кэмҥэ тутар “Помоги выжить” пууҥҥа аҕалбыттара.

Салайааччы Екатерина Безрученко иһитиннэрбитинэн, ыты аҕалалларыгар наар ырдьыгыныыр эбит.  Пууҥҥа аҕалан анал вольерга хаайбыттар. Салгыы туох буолбутун туһунан Екатерина Безрученко кэпсээтэ:
— Алабайы бэҕэһээ аҕалбыттарыгар тута вольерга хаайбыппыт. Бэлиэтээн аһарбытым курдук, үлэһиттэрбит чахчы уопуттаах буолан тутан аҕалбыттар. Вольер иһигэр кини баайыыта суох көҥүл сылдьар. Аһатаары чугаһаатахха, саба түһээри гынар, тииһин килэтэр, ырдьыгыныыр. Олус хабыр, кутталлаах ыкка түбэстибит! Билигин кинини хайдах аһатар туһунан толкуйдуубут. Маннык улахан боруода ыттар хаһаайыттар эппиэтинэһэ суохтарыттан көҥүл баран дьоҥҥо саба түһэллэр. Хас биирдии ыттаах хаһаайын эппиэтинэһи өйдөөн туран ыты иитэ ылыахтаах!