“ДАЛАН ДАРХАН далааһына”

“Норуотун историятын уус-уран айымньыга тилиннэрбит, былыргы кэмнэр илбистээх сэрэйиилэрин, кыргыс үйэтин хааннаах олбоҕун, үөһэттэн түһэр алгыһы, арҕааттан ааҥныыр кырыыһы тэҥҥэ тэнитэн көрбүт, тус бэйэтэ система балыырдаах атаҕастабылын уйбут, сайдыы саҕахтарын сэгэппит суруйааччы, Василий Семенович Яковлев-Далан, олоҕо, айар үлэтэ ХХ үйэ иккис аҥарыгар саха интеллигенциятын дьылҕатын холобурунан буолар. Бастыҥтан бастыҥ холобурунан – ыарахаттары уйбутунан, норуотун таҥнарбатаҕынан, ону ааһан, аар саарга аатырдыбытынан! Далан ДАРХАН…”.

 Наталья ХАРЛАМПЬЕВА,  саха норуодунай поэта.

Быйыл, муус устар 1 күнүгэр, биһиги киэн туттар биир дойдулаахпыт, таптыыр, сүгүрүйэр суруйааччыбыт Василий Семенович ЯКОВЛЕВ-ДАЛАН төрөөбүтэ 95 сылын туолла.

Талааннаах суруйааччы бу үбүлүөйдээх бэлиэ даатата төрөөбүт дойдутугар, өрөспүүбүлүкэҕэ киэҥник бэлиэтэнэр.

Ол курдук, быйыл кулун тутар 31 күнүттэн ыам ыйын 26 күнүгэр диэри Чурапчы улууһун “Саҥа олох” хаһыатын эрэдээксийэтэ, Чурапчыттан төрүттээх култуура диэйэтэллэрин көҕүлээһиннэринэн, Саха сирин Суруйааччыларын сойууһун, өрөспүүбүлүкэтээҕи “Саха сирэ”  хаһыат эрэдээксийэтин  өйөбүллэринэн,  Саха Өрөспүүбүлүкэтин норуодунай суруйааччыта, СӨ П.А.Ойуунускай аатынан Судаарыстыбаннай бириэмийэтин лауреата,  Доҕордоһуу уордьанын кавалера, педагогическай наука кандидата, СӨ Духуобунаһын академиятын академига, үлэ бэтэрээнэ, тапталлаах суруйааччыбыт Василий Семенович ЯКОВЛЕВ-ДАЛАН олоҕор, айар үлэтигэр аналлаах литературнай викторинаны ыытта.

Тэрийээччилэр, викторина ыйытыыларын бэлэмнииргэ көмөлөспүт РФ үөрэҕириитин туйгуна, РФ уопсай үөрэхтээһинин бочуоттаах үлэһитэ, Учууталлар учууталлара, РФ, СӨ Суруналыыстарын сойууһун чилиэнэ, хоһоонньут, фотограф, Хатылы нэһилиэгин бочуоттаах олохтооҕо Матрена Поповаҕа уонна викторинаны көҕүлээбит Чурапчыттан төрүттээх култуура диэйэтэллэрин бөлөҕөр (салайааччы Я.В.Игнатьева ) махталларын биллэрэллэр.

Дьэ, кимнээх кыайдылар? 

I истиэпэннээх диплом — Прасковья Михайловна ВАСИЛЬЕВА, Мугудай с., II истиэпэннээх диплом — Жоржетта Ивановна ТЕКЕЯНОВА, Горнай улууһа. Маҕарас с., II истиэпэннээх диплом — Римма Иннокентьевна КОРЯКИНА-Хотууна, Чурапчы с., III  истиэпэннээх диплом — Антонина Павловна ПЕРЕВАЛОВА, Чурапчы с. Биһирэбил — Семен Новгородов аатынан ЧУРАПЧЫ орто оскуолатын 2 “а”  кылааһын үөрэнээччилэрэ. Кыайыылаахтарга дипломнар, өйдөбүнньүк бириистэр туттарылыннылар.

Көстөрүн курдук, бааллара тэҥнэһэн, Дьүүллүүр сүбэ быһаарыытынан, II истиэпэннээх диплом икки буолла. Оттон оскуола оҕолоро кыттыбыттара биһирэнэр. Кинилэр учууталларыгар уонна викторина бары кыттааччыларыгар махтал!

Жоржетта ТЕКЕЯНОВА, “Айтал” түөлбэ салайааччыта, Горнай, Маҕарас:

—-Мин литературнай викториналарга кыттарбын олус сөбүлүүбүн. 2002 сылтан саҕалаан, «Саха сирэ» хаһыат тэрийэр викториналарыгар барыларыгар кыттыбытым, викторина фанатабын. Оттон бу “Саҥа олох” хаһыакка тахсыбыт викторинаҕа, айар куттаах дьүөгэлэрбиттэн истэн, кытынным. Бэйэм кыыспын, түөлбэм оҕолорун  «Кэскил» хаһыат викторинатыгар кытыннарбытым. Оҕолорум да, мин да куруутун бириистээх миэстэлэргэ тиксэрбититтэн үөрэбит. Викторинаҕа кыттаары бибилэтиэкэҕэ сылдьан, элбэх кинигэни ааҕан, архыыптары хасыһан, көрдөөн, чахчылары чуолкайдаан, билиигин хаҥатаҕын, сайдаҕын.  Мин СӨ Национальнай бибилэтиэкэтигэр, нэһилиэгим, улууһум бибилэтиэкэлэригэр мэлдьи сылдьабын, бибилэтиэкэ үлэһиттэригэр, көмөлөрүн иһин махтанабын. Пандемия кэмигэр араас күрэхтэргэ, викториналарга кыттан, 170 грамоталаахпын. Сиэммин Аделинаны, уһуйаантан саҕалаан, бэйэбин кытта бары күрэхтэргэ кытыннарабын, 30 — тан тахса грамоталаах. Иккиэн хоһоон ааҕыытыгар кыттан эмиэ ситиһиилэнэбит.
«Айтал» түөлбэбин 28-с  сылбын салайабын, ТОС  «Айтал» регистрацияланан үлэлээбиппит от ыйыгар 5 сылын туолар. Бэрэсидьиэн гранын тутан, спортивнай инбэнтээр ылбыппыт, онон, түөлбэбит дьоно — сэргэтэ доруобуйаларын тупсарыналлар. Түөлбэбитигэр Оҕо былаһаакката үлэлиир, онно оҕолорбут сайыҥҥы кэмнэрин туһалаахтык атаараллар, сибэкки, оҕуруот олордон, көрөн-истэн, бүөбэйдииллэр. Бэйэм кэтэх хаһаайыстыбалаахпын, сайынын оттоһобун, сир аһын арааһын хомуйан, соҕотуопкалаан,  атыылаан дохуот киллэринэбин.
Тапталлаах хаһыатым ааҕааччыларын, оҕолоргутун, сиэннэргитин кэрэҕэ — сырдыкка угуйан, элбэхтик кинигэтэ, хаһыатта, сурунаалла аахтараргытыгар ыҥырабын. Оччоҕуна кинилэр үгүс саҥаны билиэхтэрэ, кэрэни сэргиэхтэрэ, сайдыылаах буолуохтара!

Татьяна МАРКОВА.