«Далбар Хотун» 30 сылыгар анаммыт быыстапка дьон-сэргэ болҕомтотун тарта.
Быйыл «Далбар Хотун» сурунаал төрүттэммитэ 30 сылын туолар. Сурунаал 30 сыллаах үбүлүөйэ дойдуга биллэриллибит Дьиэ кэргэн сылыгар түбэспитэ ураты суолталаах.
Бастакы бэрисидьиэммит Михаил Николаев түһүүлээх-тахсыылаах 1990-с сылларга олох төрдө дьиэ кэргэн буоларын өйдөөн, 1994 сылы өрөспүүбүлүкэҕэ Дьиэ кэргэн сылынан биллэрбитэ. Ол сыл кулун тутар ыйыгар ийэлэри, эбээлэри, эдьиийдэри, балыстары уруйдуур «Далбар Хотун» сурунаал норуодунай суруйааччы Наталья Харлампьева эрэдээктэрдээх күн сирин көрбүтэ. Сурунаал тута ааҕааччыларга сөбүлэтэн, өрөспүүбүлүкэ бары муннуктарыгар күүтүүлээх ыалдьытынан буолбута . Өрөспүүбүлүкэ уопсастыбаннай олоҕор биллэр-көстөр дьахталлар, күн-күбэй ийэлэр, эбээлэр, кэрэ кыргыттар, ону кытта аҕа баһылыктар туһунан сэргэх матырыйааллар бииртэн-биир тахсыталаан барбыттара.
Кулун тутар 1 күнүгэр «Олох ойуута» диэн Комдрагмет дьиэтин 2 мэндиэмэнигэр “Далбар Хотун” сурунаал 30 сыллаах үбүлүөйүгэр анаммыт 30 сыллаах айымньылаах үлэтин кэпсиир быыстапканы үөрүүлээх быһыыга-майгыга астылар.
Быыстапканы үөрүүлээхтик арыйыыга «Далбар Хотун» бастакы эрэдээктэрэ, норуодунай суруйааччы Наталья Харлампьева, «Сахабэчээт» генеральнай дириэктэрэ Ньургуйаана Стручкова, сурунаал сирэйигэр тахсыбыт дьоруойдар кэлэн эҕэрдэлэринэн кыттыстылар.
«Өрөспүүбүлүкэ былааһын үрдүк таһымыгар туруорсан, киһи аймах кэрэ аҥарыгар анаммыт сурунаал тахсарын ситиспиппит. Оччолорго мин Саха өрөспүүбүлүкэтин бырабыыталыстыбатын солбуйааччынан олорбутум. Бастакы эрэдээктэринэн Наталья Ивановна Харлампьева ананан, сурунаал өрөспүүбүлүкэ олоҕун дьахтар үлэтин-хамнаһын, тапталын нөҥүө көрдөрөн, бэрт үчүгэйдик бэчээккэ тахсан барбыта», – диэн Альбина Поисеева санаатын үллэһиннэ.
Быыстапканы үөрүүлээхтик арыйыыга сурунаал дьоруойдара эҕэрдэлии кэллилэр. Олор ортолоругар, 1990-с сылларга Саха сирин бэлиитикэтин уонна уопсастыбаннай олоҕор бэлиэ суолу хаалларбыт Ульяна Винокурова, Люлия Григорьева, Валентина Кириллина, култуура үтүөлээхтэрэ Анегина Ильина, кинилэри сырдаппыт бастакы ааптардар уонна да атыттар истиҥ эҕэрдэлэрин тиэртилэр.
Быыстапкаҕа 1994 сылтан тахсыбыт матырыйааллар хаартысканан көрдөрүлүннүлэр. Маныаха бэлиэтиир наада, хас биирдии хартыына куйаар куоттаах, онон киирэн сурунаалга тахсыбыт матырыйаалы сиһилии ааҕаҕыҥ.
Сардаана Кузьмина
Хаартыскаларга Юлия Пестрякова түһэриитэ.
Бүгүн, ыам ыйын 13 күнүгэр 18.30 чаастан Суорун Омоллоон аатынан Опера уонна балет тыйаатырыгар А.Ф.Березиков…
"Балбаахпын хаһаанар былаһааккабын хайдах оҥостобун? "Саха сирэ" хаһыакка ыстараап туһунан суруйбуккут, оттон мин тыа сиригэр…
Ыам ыйын 11-12 күннэригэр Сиргэ күүстээх магнитнай буурҕа түспүтэ бэлиэтэнэр. Маннык күүстээх магнитнай буурҕа 2003…
Өрүспүт мууһа Өлүөхүмэҕэ кэлэн хаайтаран, харыы үөскээн, уу тахсан түрүлүөн таҕыста. Өлүөхүмэ улууһугар ыксаллаах быһыы-майгы…
Саха Өрөспүүбүлүкэтин Ил Түмэнин Бэрэссэдээтэлин Дьаһала Саха Өрөспүүбүлүкэтин сэттис ыҥырыылах Судаарыстыбаннай Мунньаҕын (Ил Түмэн) сэттис…
Ыам ыйын 6 күнэ. Ил Дархан Саха сирин бортпроводниктарын сулууспата 80 сылын туолар үбүлүөйдээх күнүнэн…