«Далбар Хотун» сурунаал саҥа саайтанна

Аан дойду дьахталларын күнүн көрсө “Далбар Хотун” сурунаал саҥа саайтын сүрэхтээтэ. Куйаар ситимигэр Dalbar.ru диэн саҥа саайт баар буолла.

Саайтка сурунаал бары рубрикалара, дьоруойдара, олоххо-дьаһахха сыһыаннаах сүбэлэр, ас-үөл ырыссыаптара, уо.д.а. бааллар. Эһиил дьахталларга анаммыт бастакы сахалыы сурунаал тэриллибитэ 30 сылын туолуоҕа. Сурунаал бас эрэдээктэрэ Зинаида Архипова дьоҕус эрэдээксийэтин үлэһиттэрин билиһиннэрдэ.

“Сахабэчээт” тэрилтэ дириэктэрэ Ньургуйаана Стручкова:

— Дьахтар күнүн иннинэ дьахтар сурунаалын сүрэхтэниитэ буолбута сүрдээх үөрүүлээх түгэн. Кумааҕыга эрэ хаайтарбакка, кэҥээн, эбиллэн, ааҕааччытын кытта түргэнник кэпсэтэр, далааһыннаах куонкурустарын ыытар, хааччаҕа суох элбэх хаартысканы, суруйууну киллэрэр кыахтанна. Саҥа үйэҕэ атын полиграфическай толорууга көһүөхпүтүн наада. Аныгы ааҕааччы ирдэбилигэр эппиэттиир курдук. Саҥа дизайн, хаачыстыбалаах хаартыска, умсугутуулаах суруйуулар баар буолуохтара. Саҥа кэм бэйэтэ оннук кэрэһилиир. Аныгы ыал ийэтин өйө-санаата, дьаһала-дьаһаҕа, дьиэ ис бараана, хаһаайыстыбата, о.д.а. барыта сурунаалга көстүөхтээх. Аныгы ийэ уобараһа хайдаҕын чопчулуур, ыйытыыларга эппиэттиир түһүлгэ буолуохтаах. Онон саҥа редколлегияны таллыбыт. Атын форматка көһүү, иһинээҕитин саҥардыы үлэтэ барыаҕа. Саҥа сүүрээннэри киллэрэргэ ааҕааччыларбыт да өйүөхтэрэ дии саныыбын.

“Далбар Хотун” сурунаал 1994 сыллаахха тэриллибитэ. Оччотооҕу уустук сылларга хайдах үлэлээбиттэрин, тэрийбиттэрин туһунан бастакы эрэдээктэр, норуодунай поэт Наталья Харлампьева бу курдук кэпсээтэ, баҕа санаатын тиэртэ:

— Бастакы нүөмэрдэрин оҥорсубут киһи, сурунаал саҥа үктэллэри дабайан иһэриттэн үөрүөх эрэ кэриҥнээхпин. Урукку нүөмэрдэри архыыпка киллэриэхпит диэн этиини үөрэ иһиттим. Ол саҕана дьону түмэн, түүннэри-күнүстэри үлэлээн, саҥа сурунаалы таһаарыы уустуктардаах этэ. “Далбар Хотун” саҥа кэм кэрэһитэ буолан кэлбитэ. Офсет бэчээтэ саҥа киирэн эрэрэ, өҥү араарыы үлэтэ Новосибирскайынан эргийэн кэлэрэ. Манна сурналыыстар Нина Протопоповаттан саҕалаан, эдэрдиин-эмэнниин үлэлэспиттэрэ. Анастасия Божедонова салайар пуондата, онтон бырабыыталыстыба бэрэссэдээтэлэ Семен Назаров өйөөбүттэрэ. Онон ол саҕанааҕы нүөмэрдэр архыыптаналлара наада. Саайт ааҕааччыны кытта сибээһи үөскэтиэн сөп. Ааҕааччы суруга сүтэн эрдэҕинэ, маннык ньыманы тарҕатар наада. Сурунаал элбэх дьону түмэн, “Далбар Хотун” куонкуруһун кэҥэтэн, салгыы сайдан иһэригэр баҕарабын. Эһиил 30 сыла киэҥник бэлиэтэниэхтээх, ол сурутууга дьайыахтаах дии саныыбын, — диэн кини эттэ.

Хаартыска: ааптар түһэриилэрэ.