«Дальний Восток – земля приключений» диэн куонкуруска 120-тэн тахса сайаапка киирбит

Бу күһүн ыытыллыбыт Илиннээҕи экэнэмиичэскэй пуорум кэмигэр «Дальний Восток – земля приключений» диэн куонкурус саҕаламмыта.

РФ бэрэсидьиэнигэр Уһук Илиҥҥи федеральнай уокурукка боломуочуйалааҕа — вице-премьер Юрий Трутнев бу күннэргэ Москва олохтоохторун куонкуруска кытталларыгар ыҥырда. «Бу саҥа куонкурус. Балаҕан ыйыттан саҕаламмыта. Билиҥҥи туругунан 120-тэн тахса сайаапка  киирдэ. Олор истэригэр Москва куораттан эмиэ бааллар. Сайаапканы биэрбиттэр  Уһук Илин уокурукка сылдьыахтара уонна сөбүлээтэхтэринэ, хаалан олохсуйуохтарын  да сөп буоллаҕа», — диэн Юрий Трутнев санаатын үллэстибит.

Санатар буоллахха, куонкурус балаһыанньатынан Уһук Илиҥҥи уокурукка тиийиллиэхтээх уонна тэрийээччилэргэ хайдах күүлэйдээбити көрдөрөр видеоролигы ыытыллар. Дьүүллүүр сүбэ көрөн, кыайыылаахтары быһаарар. Сайаапканы  «ПутешественникДВ.РФ.» диэн саайтка бэриллэр. Куонкурус сыл устата ыытыллар.Онон 2023 сыл балаҕан ыйыгар түмүктэнэр. Кыайыылаахтар харчынан наҕараадаланыахтара.