“Дальний Восток – земля приключений” куонкурус саайтыгар айан интерактивнай каартатын көрүөххэ сөп

“Уһук Илин – мүлчүргэннээх сырыы дойдута” (“Дальний Восток – земля приключений”) Уһук Илиҥҥэ уонна Арктикаҕа бастыҥ айан Бүтүн Арассыыйатааҕы куонкуруһун  путешественникдв.рф саайтыгар куонкурус бастакы уонна иккис сезонун кыттыылаахтарын айаннарын маршруттара көстөр интерактивнай каартата таҕыста.  Каартаны РФ Бырабыыталыстыбатын Бэрэссэдээтэлин солбуйааччы – РФ Бэрэсидьиэнин Уһук Илиҥҥэ боломуочуйалаах бэрэстэбиитэлэ Юрий Трутнев сорудаҕынан оҥоһулунна.

“Бу куонкурус Уһук Илин эрэгийиэннэрин туһунан дойду үгүс олохтооҕо билэн, сылдьарын туһугар тэриллибитэ. Куонкурус кыттыылаахтарын көмөтүнэн ханна айанныахха сөбүгэр интерактивнай каарта оҥоһулунна. Бу куонкуруһу өссө салгыахпыт, Уһук Илиҥҥэ туризмы сайыннарыахпыт. Дьону туундараны, тайҕаны, акыйааны уонна Байкалы, Амуру, Өлүөнэни , вулканнары, гейзердэри көрөргө угуйуохпут”, — диэтэ Юрий Трутнев.

Интерактивнай каартаны оҥоруу партнерунан “ИдиЛесом” сервис буолла. Маршруттар куонкурус кыттыылаахтарын киинэлэригэр олоҕурда. Хайдах айаннаан тиийии, уһуна, сүрүн туочукалар координаттара эҥин бааллар. Ону тэҥэ айан GPS-трек маршрутун төлөпүөҥҥэ уонна навигаторга хачайдыахха сөп.

путешественникдв.рф саайтыгар “Карты маршрутов” диэн салааҕа куонкурус 1 уонна 2 сезонун кыттыылааҕын 100 маршрута киирдэ. Айан суолун эбэн иһиэхтэрэ.

Бу айан Бүтүн Арассыыйатааҕы куонкуруһун үһүс сезонугар кыттыыга сайаапкалары 2026 сыл тохсунньу 15 күнүгэр диэри ылыахтара. Манна кыттарга 8 мүнүүтэлээх кылгас киинэни Уһук Илиҥҥэ эбэтэр Арктикаҕа айан туһунан устан бу саайтка ыытыахтааххыт.

Куонкурус түөрт номинациялаах: сатыы, уунан, сиринэн, Арктикаҕа айан. Бастыҥ видео иһин сүрүн бириис – 3 мөл. солкуобай.

Куонкурус РФ Бэрэсидьиэнин Уһук Илиҥҥэ боломуочуйалаах бэрэстэбиитэлин аппараатын, Арассыыйа Уһук Илини сайыннарыыга министиэристибэтин, “Корпорация развития Дальнего Востока и Арктики” АУо уонна “Фонд развития социальных инициатив” НКО өйөбүллэринэн ыытыллар.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата

Сиһилии: https://www.sakha.gov.ru/news/12679