“Дальний Восток – Земля приключений” куонкурус шорт-илииһигэр Саха сиригэр айаннааһын туһунан үс киинэ киирдэ

“Дальний Восток – Земля приключений” айанньыттар Бүтүн Арассыыйатааҕы куонкурустарын иккис сезонун жюрита 80 киинэни талла, олор ортолоругар Саха сирин туһунан үс киинэ баар.

Бастыҥнар кэккэлэригэр “Уунан айан” уонна “Кыһыҥҥы айан” номинацияларга кылгас киинэлэр киирдилэр.

Алтаай кыраайытан айанньыт Виталий Самойлов дьиэ кэргэнин кытта оҕо сааһа ааспыт Усуйаана оройуонун Севернэй бөһүөлэгэр айанын түмүктээбит. Онно байдаарканан 25 күн 600 килэмиэтири айаннаабыттар. Оттон альпинист уонна айанньыт Андрей Рукавишников Бүтүн Арассыыйатааҕы куонкуруска Сунтаар-Хайатын дабайыытын туһунан киинэтин киллэрбит.

Наҕараадалааһын сиэрэ-туома бүгүн Москва бириэмэтинэн 12:00 “Россия” Национальнай кииҥҥэ ыытыллыаҕа. “ВКонтакте” платформаҕа быһа эпииргэ көрдөрүөхтэрэ.

Быйыл куонкурус түмүгүн РФ Бырабыыталыстыбатын Бэрэссэдээтэлин солбуйааччы уонна РФ Бэрэсидьиэнин Уһук Илин федеральнай уокуругар боломуочуйалаах бэрэстэбиитэлэ Юрий Трутнев таһаарыаҕа.

“Биһиги Уһук Илин кэрэтин туһунан элбэх киһи билиэн уонна ону айанньыт хараҕынан көрөллөрүгэр баҕарабыт. Ол иһин бу куонкурус тэриллибитэ. Айан туһунан бастыҥ киинэлэр ааптардарын “Россия”Национальнай кииҥҥэ наҕараадалыахпыт. Куонкуруска кыттыбыт киинэлэр Уһук Илиҥҥэ атын дьон эмиэ кэлэллэригэр көҕүлүө дии саныыбын”, — диэтэ Юрий Трутнев.

Куонкурус иккис сезонугар 664 киинэ киирбитэ. Бу бастакы сезоннааҕар үс төгүл элбэх. Балартан 44 ролик сатыы айаҥҥа, 128 – уунан уонна 92 – кыһыҥҥы сырыыларга. Саамай элбэх киинэ Сахалин уобалаһыгар (142), Хабаровскай кыраайга (112) уонна  Камчатка кыраайыгар (110) уһуллубут.

Номинацияларга кыайыылаахаар харчынан бириистэри тутуохтара: бастакы миэстэҕэ – биир мөлүйүөн солкуобай, иккискэ – 300 тыһыынча солкуобай уонна үһүскэ – 100 тыһыынча солкуобай. Куонкурус кылаабынай бирииһэ – 3 мөлүйүөн солкуобай – Уһук Илиҥҥ айан туһунан киинэ ааптарыгар, саамай элбэх баалы ылбыт киһиэхэ туттарыллыаҕа.

Куонкурус соруга – Уһук Илини сынньанарга ураты хайысха быһыытынан киэҥник сырдатыы.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата