«Дальний Восток — Земля приключений»  куонкуруска 350-тан тахса видеонан үлэ киирдэ

«Дальний Восток — Земля приключений» куонкурус үһүс сезонун биэс ыйдааҕы түмүгүнэн, дьүүллүүр сүбэ көрүүтүгэр 352 киинэ киирдэ.

Бу 2024 сылы кытта тэҥнээтэххэ 1,7 төгүл элбэх. Бу туһунан бырайыак көҕүлээччитэ, РФ Бырабыыталыстыбатын бэрэссэдээтэлин солбуйааччы – РФ Бэрэсидьиэнин Уһук Илиҥҥи федеральнай уокуруктааҕы боломуочуйалаах бэрэстэбиитэлэ Юрий Трутнев иһитиннэрдэ.

«Уһук Илин кэрэ айылҕатынан аатырар. Биһиги куонкуруспут Уһук Илин эрэгийиэннэрин кэрэтин туһунан дьон элбэҕэ билиэхтэрин эрэ буолбакка, бэйэлэрэ кэлэн вулкааннары, хайалары, тайҕаны, истиэби уонна туундараны илэ харахтарынан көрөллөрүгэр туһуланар. Ол туһугар биһиги куонкуруспут тэриллибитэ. Араас эрэгийиэннэртэн дьон бэйэлэрин туристическай каарталарын оҥостон, айаҥҥа туруналлар, ол туһунан кэрэ киинэлэри уһулаллар, онтон бастыҥнарын дьүүллүүр сүбэ чилиэннэрэ талаллар. Билигин дьүүллүүр сүбэ көрүүтүгэр 300-тэн тахса киинэ киирэн турар. Бу ааспыт сылы кытта тэҥнээтэххэ 1,7 төгүл элбэх. Куонкуруска, ол аата Уһук Илиҥҥэ уонна Арктикаҕа, интэриэс үрдээн иһэр», – диэн Юрий Трутнев эттэ.

Киинэ ахсаанынан инники күөҥҥэ сылдьаллар: Сахалин уобалаһа – 129 киинэ, Хабаровскай кыраай – 49 киинэ, Приморскай кыраай – 38 киинэ. Амур уобалаһынан айан туһунан 26 видеоролик уһуллубут, Еврейскай аптаныамыйалаах уобалаһынан – 21 киинэ, Камчатка кыраайынан – 16 киинэ, Бурятия Өрөспүүбүлүкэтинэн – 13 үлэ. Магадан уобалаһынан уонна Забайкальскай кыраайынан туристическай маршруттар туһунан кыттааччылар 11-дии киинэни ыыппыттар, Саха сирэ – 9, Чукоткатааҕы аптаныамыйалаах уокуруктан– 4 киинэ.

Бастыҥ айаҥҥа аналлаах  куонкурус үһүс сезонугар кыттарга сайаапкалары тутуу 2026 сыл тохсунньу 15 күнүгэр диэри салҕанар. Кыттыыны ыларга, Уһук Илин эбэтэр Арктика устун айаныҥ туһунан 8 мүнүүтэҕэ диэри уһуннаах кылгас киинэни устуохха уонна ону путешественникдв.рф саайтка киирэн ыытыахха наада.