«Дальний Восток — Земля приключений» куонкуруска саҥа номинация баар буолла

Бүтүн Арассыыйатааҕы «Дальний Восток – Земля приключений» куонкуруска саҥа номинация киирэн,  дьүүллүүр сүбэ Арассыыйа Уһук Илиҥҥи федеральнай уокуругар уонна Арктическай зонатыгар баар байыаннай албан аат маршруттарынан айан туһунан киинэлэри ылар. Сайаапкалар байыаннай-историческай туризмы тарҕатарга уонна Арассыыйа дьоруойдарын кэриэстэрин үйэтитэргэ олохтоммут «Кыайыы суоллара» анал номинация чэрчитинэн көрүллэллэр. Бу туһунан бырайыак көҕүлээччитэ, РФ бырабыыталыстыбатын бэрэссэдээтэлин солбуйааччы — Уһук Илиҥҥи федеральнай уокурукка бэрэсидьиэн боломуочуйалаах бэрэстэбиитэлэ Юрий Трутнев иһитиннэрдэ.

Куонкурус усулуобуйатынан, «Кыайыы суоллара» номинацияҕа бойобуой албан ааттаах сирдэргэ походтар уонна экспедициялар, сэбиэскэй саллааттар хорсун быһыылара, Аҕа дойду Улуу сэриититтэн  хаалбыт бөҕөргөтүүлэр, ону тэҥэ Арассыыйа байыаннай историятын кытта сибээстээх аҕыйахтык үөрэтиллибит өйдөбүнньүк сирдэр тустарынан  киинэлэри уонна видеорепортажтары ылаллар. Көрдүүр бөлөхтөр уонна историческай реконструктордар кыттар киинэлэрэ ордук үчүгэйдик көрүллэллэр.

Күрэхтэһиигэ ким баҕарар кыттыан сөп. Онуоха кинилэр 2026 сыл тохсунньу 15 күнүгэр диэри  сайт путешественникдв.рф сайтка 8 мүнүүтэҕэ диэри уһуннаах видеоны угуохтаахтар. Айан 2023 сыл ыам ыйын 1 күнүттэн 2026 сыл тохсунньу 15 күнүгэр диэри оҥоһуллуохтаах. Киинэ устар формата хааччахтаммат — профессиональнай да, мобильнай устар тэриллэр да көҥүллэнэллэр, тоҕо диэтэр, ордук ис хоһоонноро уонна уус-уран суолталара сыаналаналлар.

Анал номинация кыайыылааҕа 500 тыһ. солкуобай харчынан бириэмийэни ылар, иккис миэстэ иһин 300 тыһ.солк., үһүс миэстэ иһин 200 тыһ. солк. Ону таһынан, дьүүллүүр сүбэ быһаарыытынан, биирдиилээн айымньылар ааптардарыгар анал бириистэр туттарыллыахтарын сөп. Итини тэҥэ, «Кыайыы суолларыгар» кыттааччылар «Дальний Восток – Земля приключений» куонкурус сүрүн номинацияларыгар кытталлар.

Юрий Трутнев Арассыыйа 2025 сылга Аҕа дойду Улуу сэриитигэр Кыайыы 80 сылын бэлиэтиир, эһэлэрбит үтүөлэрин үйэтитии уонна тиэрдии ордук суолталааҕын тоһоҕолоото.

“Уһук Илин уонна Арктика Кыайыыга улахан кылааттарын киллэрбиттэрэ, дойдуну баайынан хааччыйбыттара уонна тырааныспар суолларын харыстаабыттара. Хотугу муора суола таһаҕаһы тиэйиигэ уонна тыылы хааччыйыыга тыын суолталаах хорук тымыр буолбута. Уһук Илин олохтоохторо уонна хотугу дьон Кыайыыны чугаһатар туһугар кыахтарын барытын уурбуттара. Онтон билигин ыччаты үөрэтии, Кыайыы сыанатын өйдөтүү улахан суолталаах», — диэтэ РФ бырабыыталыстыбатын бэрэссэдээтэлин солбуйааччы — Уһук Илиҥҥи федеральнай уокурукка бэрэсидьиэн боломуочуйалаах бэрэстэбиитэлэ Юрий Трутнев.

Куонкурус үһүс сезона саҕаланыаҕыттан, дьүүллүүр сүбэҕэ өрөспүүбүлүкэ араас муннугуттан кыттааччылартан 95 киинэ киирбитэ. Тэрийээччилэр  патриотическай хамсааһынҥа кыттыһан, Уһук Илиҥҥи уонна Арктика дьоруойдуу ааспыт кэмнэрин камера объективынан кэпсииргэ ыҥыраллар.