«Дальний Восток – земля приключений» түмүгүн быһа эпииргэ көрдөрүөхтэрэ

Кулун тутар 5 күнүгэр Москва бириэмэтинэн 12.00 ч. «Россия» Национальнай кииҥҥэ «Дальний Восток – земля приключений» Бүтүн Арассыыйатааҕы куонкурус иккис сезонун кыайыылаахтарын наҕараадалыахтара.

Тэрээһини «ВКонтакте» платформаҕа быһа эпииргэ көрдөрүөхтэрэ.

Быйылгы күрэс түмүгүн РФ Бырабыыталыстыба бэрэссэдээтэлин солбуйааччы — РФ Бэрэсидьиэнин Уһук Илиҥҥи федеральнай уокурукка боломуочуйалаах бэрэстэбиитэлэ Юрий Трутнев иһитиннэриэҕэ.

«Биһиги Уһук Илин кэрэтин туһунан элбэх киһи билиэн уонна бу ураты кэрэ сиргэ айаннаан ону уу харахтарынан көрүөхтэрин баҕарабыт. Ол инниттэн «Дальний Восток – Земля приключений» күөн күрэс тэриллибитэ. Бэйэлэрин айаннарын туһунан бастыҥ киинэлэр ааптардара «Россия» Национальнай кииҥҥэ наҕараадаланыахтара. Күөн күрэскэ кыттыбыттар устубут киинэлэрэ Уһук Илини дьон көрөр баҕатын күүһүрдэригэр эрэнэбин«, — диэтэ Юрий Трутнев.

Куонкурус соруга — Уһук Илини сынньалаҥ ураты хайысхатын быһыытынан киэҥник биллэрии-көрдөрүү. Манна кыттааччылар бэйэлэрин айаннарын-сырыыларын туһунан роликтары усталлар. Кинилэр онон дьону-сэргэни угуйаллар, ыҥыраллар.

Бу үлэлэр ким баҕарар сааһыттан, уоппускатын күнүттэн, о.д.а. тутулуга суох эрэгийиэн ханна да хатыламмат ураты кэрэтин көрөр кыахтааҕын көрдөрөллөр. «Дальний Восток – земля приключений» куонкурус Юрий Трутнев көҕүлээһининэн 2022 сылтан ыытыллар.

Күрэс иккис сезонугар уопсайа 664 үлэ киирбит. Бу бастакы сырыытааҕар үс төгүл элбэҕэ бэлиэтэнэр. Манна 444 ролик сатыы айаны, 128 — уунан уонна 92 — кыһыҥҥы сынньалаҥы көрдөрөллөр. Элбэх үлэ Сахалин уобалаһыттан (142), Хабаровскай кыраайтан (112) уонна Камчаткаттан (110) киирбит.

Саха сирэ ураты айылҕатынан, баай култууратынан Уһук Илин каартатыгар биир саамай чаҕылхайдарынан буолар. Тэрийээччилэр эрэгийиэн кыһыҥҥы айана ордук ураты усулуобуйалааҕынан, ыты көлүйэн, хайыһарынан айаннааһынынан  уратылааҕын этэллэр. Өрөспүүбүлүкэттэн куонкуруска 48 ролик киирбит.

Алтайтан айанньыт Виталий Самойлов дьиэ кэргэнин кытта Усуйаанаҕа Севернайга сылдьыбыт. Онно кини оҕо сааһа ааспыт. Оҕо сааһа ааспыт сиригэр 25 күн устата байдарканан устан 600 км айаннаабыт. Онтон альпинист уонна айанньыт Андрей Рукавишников «Дальний Восток – Земля приключений» куонкуруска Сунтаар Хайатыгар дабайыытын устан ыыппыта көрүөхтэн эриэккэс.

Маны сэргэ, кыһыҥҥы марафон туһунан видеонан устуу киирбит. Манна даҕатан эттэххэ, бу марафон сыл ахсын Саха сиригэр ыытыллар. Ааптар Дмитрий Панов. Тохсунньуга «Полюс холода — Оймякон» сүүрүүгэ 50 спортсмен кыттыбыт. Кинилэр 50 кыраадыс тымныыга 42 км сүүрбүттэрэ сөхтөрөр.

Хас биирдии номинация кыайыылаахтара харчынан бирииһи тутуохтара. Сиһилии бу сигэнэн киирэн көрүҥ: http://путешественникдв.рф.

СӨ Ил Дарханын уонна Бырабыыталыстыбатын пресс-сулууспата