Далырдар кыһалҕаларын үс чаас быһаарыстылар

Ситэриилээх былаас уорганын отчуоттуур бөлөҕө эбиэт кэнниттэн Үөһээ Бүлүү улууһун Далыр нэһилиэгэр үлэлээтэ.
Улуус кииниттэн 75 км хоту диэки сытар Далыр нэһилиэнньэтин ахсаана 900-н тахса киһи, 68155 гектар сирдээх. Орто оскуола, оҕо уһуйаана, биэлсэр-акушер пууна үлэлиир.
Мунньахха Бырабыыталыстыба отчуоттуур бөлөҕүн салайааччыта, СӨ Тырааныспар уонна суол хаһаайыстыбатын миниистирэ Владимир Сивцев өрөспүүбүлүкэ салалтатын 2022 с. үлэтин түмүгүн, социальнай-экэнэмиичэскэй сайдыытын, ол иһигэр Үөһээ Бүлүү улууһун өҥөтүн туһунан кэпсээтэ.

Нэһилиэк олохтоохторо оскуолаҕа успуорт саалатын, гаас киириитин, оҕо-үлэ сынньалаҥ лааҕырын тэрийиини, балыыһа аһыллыытын, күһүҥҥү өртөөһүнү туруорустулар.
Оскуола успуордун саалатын тутуу боппуруоһа турбут, симиэтэтэ кытары баар эбит. Ол гынан баран, бу боппуруос тохтоон хаалбыт. Ону улуус баһылыга Владимир Поскачин сүүрэр-көтөр киһини анаан, саҥаттан туруорсалларыгар сүбэлээтэ. Онтон оҕо-сынньалаҥ лааҕырын тэрийии олус үчүгэй идиэйэ, ол оройуон кыаҕын иһинэн быһаарыллыан сөптөөҕө этилиннэ. Ынах сүөһү, сылгы иитиитин, үүт субсидиятын боппуруоһугар турбут ыйытыыларга улуус баһылыга хоруйдаата. «Тыа хаһаайыстыбатыгар билиҥҥи курдук көмө хаһан да оҥоһуллубатаҕын оҥоһулунна. Баҕалаах киһи бааһынай-пиэрмэр хаһаайыстыбатын тэринэн үлэлииригэр усулуобуйа баар», — диэн кини быһаарда. Нэһилиэк баһылыга
Георгий Егорович Иванов сибээс мөлтөҕүн, оттук сыаната үрдүүрүн, быстах байыаннай дьайыыларга сылдьааччыларга, о.д.а. элбэх боппуруоска этиннэ. Бырабыыталыстыба отчуотугар аналитическай киин туох боппуруос турбутун, туох оҥоһуллубутун, быһаарыллар таһымҥа сылдьарын көрдөрөр интеллектуальнай ноҕоруускалааҕа буоллар, нэһилиэнньэҕэ интэриэһинэй буолуо этэ диэн баҕа санааларын эттилэр.

Биир мөккүөрдээх боппуруоһунан, бөҕү хомуйууга төлөбүр туһунан буолла. Нэһилиэк дьокутаата Татьяна Васильевна Федотова кыра нэһилиэккэ бөҕү тоҕо хаһаайыстыбаттан буолбакка, киһи ахсаанынан төлүүллэрин ыйытта. Бөҕү син биир бэйэлэрин сыбаалкаларыгар тоҕоллоро, ханна даҕаны переработкаҕа ыыппаттара этилиннэ. Быраабыла быһыытынан бары нуорманан төлөнүллэр диэн быһаардылар.

Чоросова Ульяна Валериевна дьоҕус баһаарынай чаас дьиэтин тутууну туруоруста.
Социальнай үлэһит Софронов Аскалон Егорович аҥардас хаалбыт дьон дьылҕата долгутарын эттэ. Урут Ньурба улууһугар кырдьаҕастар дьиэлэригэр ыыталлара. Аны, Үөһээ Бүлүүгэ бэйэтигэр аҥардас хаалбыт, кыаммат дьону көрөр аныгылыы тутуулаах дьиэ былааннаммытын, үлэ барарын туһунан улуус баһылыга Владимир Поскачин кэпсээтэ.
Онтон элбэх оҕолоох ийэ, пенсионерка Осипова Валентина Захаровна элбэх оҕолоохторго көмө дьаһалларын туһунан боппуруоһу туруорда. Кини 11 оҕону төрөтөн, үс уола Чечняҕа сэриилэһэн, 10 оҕото ийэ, аҕа буолан, бары бэйэлэрэ оҕо-уруу бөҕө тэнитэн баран туох да көмөҕө тиксибэтэхтэр. Валентина Захаровна боппуруоһа уустугунан, тустаан кэпсэтэргэ ыҥырдылар. Чечня байыаннай дьайыытын кыттыылааҕа Осипов Егор Михайлович сүүрбэччэ сылы быһа дьиэ туруорсарын эттэ. Кини боппуруоһун тута быһаарар кыах суоҕунан, чопчулаан баран этэргэ эрэннэрдилэр. Үс чаас барбыт мунньахха далырдар тохтоло суох кыһалҕаларын этиннилэр.
Далыр нэһилиэгэр олус элбэх социальнай боппуруос турбутунан, оробуочай бөлөҕүн салайааччыта СӨ Социальнай харыстабыл министиэристибэтин кытары быһа сибээһинэн тахсан быһаарыахпыт диэн кэпсэтиини түмүктээтэ.