Далырдар социальнай боппуруостары туруорсаллар

Ситэриилээх былаас уорганын отчуоттуур бөлөҕө сарсыардаттан Үөһээ Бүлүү улууһун Далыр нэһилиэгэр үлэлээтэ.

Далыр нэһилиэгэ улуус кииниттэн 75 км хоту диэки сытар. Барыта 948 киһи олорор, оскуолаҕа 90-н тахса оҕо үөрэнэр. Орто оскуола, оҕо уһуйаана, биэлсэр-акушер пууна үлэлиир. Мунньахха Бырабыыталыстыба отчуоттуур бөлөҕүн салайааччыта, СӨ экэниэмикэтин миниистирэ Петр Попов өрөспүүбүлүкэ салалтатын 2023 с. үлэтин түмүгүн, социальнай-экэнэмиичэскэй сайдыытын, ол иһигэр Үөһээ Бүлүү улууһа онуоха өҥөтүн туһунан кэпсээтэ.

Нэһилиэк олохтоохторо успуорт саала тутуллуутун, гаас киириитин, балыыһа аһыллыытын, хаарбах дьиэттэн көһөрүү, байыаннай дьайыы, о.д.а. боппуруостары туруордулар.
Ааспыт сыллааҕы отчуокка турбут, оскуола успуордун саалатын тутуу боппуруоһа күүскэ дьүүллэһилиннэ.
Бочуоттаах сынньалаҥҥа олорор Михаил Андылыров успуорт саалатын тутуу нэһилиэги улаханнык сэргэхситиэ уонна успуорка ыччат ситиһиитэ улаатыа этэ диэтэ. Кини урут сири-уоту барытын бааһынай хаһаайыстыбаларыгар түҥэтэн кэбиспиттэрэ, билигин ол оттуур сирдэр чааһынай дьоҥҥо, туһаныллыбакка хаалалларын, ону бэрээдэктиир кэм кэлбитин туруоруста.
Нэһилиэк аҕам саастаах олохтооҕо Георгий Софронов мас оскуола баһаарынай өттүнэн сэрэхтээҕин, онон таас оскуола тутуллуута наадатын эттэ. Иккиһинэн, байыаннай дьайыыга сылдьан тыыннара быстыбыт уолаттар өлүктэрин аҕалыыга Бырабыыталыстыба тоҕо чопчу үлэни ыыппатый диэн ыйытта.

Кулууп дириэктэрэ Ульяна Чоросова кулууп дьиэтэ нэһилиэнньэ киининэн буоларын, ол эрээри олох эргэрбитин этиннэ, онон саҥа Култуура дьиэтин туруоруста.
Чечня сэриитин бэтэрээнэ Егор Осипов кинилэргэ туох да көмө оҥоһуллубатын, дьиэҕэ уочаракка турбуттара ырааппыт эрээри билигин да боппуруос быһаарылла илигин эттэ. Егор Михайлович бииргэ төрөөбүт икки быраатын кытары Чечня сэриитигэр кыттыбыттарын, ол гынан баран дьиэ ыларга туруорсуулара хаһыс да сылын быһаарыллыбакка хааларын этиннэ.

Бырабыыталыстыба чилиэннэрэ бу боппуруоһу болҕомтоҕо ылан, боротокуолга киллэрдилэр.
Нэһилиэк баһылыга Георгий Егорович Иванов нэһилиэк социальнай-экэнэмиичэскэй боппуруостары туруоруста.
Онон боротокуолга кулууп, успуорт саалатын тутуллуутун, сибээһи тупсарыы, уһуйаан хапытаалынай өрөмүөнүн, о.д.а. боппуруостарын туруорсуу киирдэ.
Нэһилиэнньэ быйылгы ситэриилээх былааһын отчуота хаһааҥҥытааҕар даҕаны аһаҕастык уонна түмүктээхтик ааста диэн астыналларын биллэрдилэр.

Хаартыскаларга ааптар түһэриитэ