Далырга «Земскэй учуутал» бырагырааманан Тываттан математика учуутала кэлиэҕэ

Саха сиригэр «Земскэй учуутал»  бырагырааманан тыа сирин оскуолаларыгар  учууталлар үлэлии барыылара элбээтэ. Тустаах бырагыраама 2020 сылтан дойду Бэрэсидьиэнэ Владимир Путин көҕүлээһининэн үлэлиир.

Бу бырагырааманан учууталларга 2 мөл. солкуобай көрүллэр. Тыа сирин нэһилиэнньэлээх пууннарыгар, 50 тыһыынча киһилээх бөһүөлэктэргэ уонна куораттарга тиийбит учууталларга биир кэмнээх төлөбүр оҥоһуллар.

Быйыл Үөһээ Бүлүү улууһун Далыр оскуолатыгар «Земскэй учуутал» федеральнай бырагырааманан  Тыва Өрөспүүбүлүкэтиттэн үрдүк категорялаах математика учуутала Донгак Шончалай Хажыт-ооловна үлэлии кэлэрэ күүтүллэр.  Бу туһунан Үөһээ Бүлүү улууһун баһылыга Валерий Николаев телеграмҥа ханаалыгар иһитиннэрдэ.

-«Земскэй учуутал» бырагырааманан улууспутугар Боотулуу, Сургуулук оскуолаларыгар — математика, Туобуйа оскуолатыгар — биология уонна химия учууталлара ситиһиилээхтик үлэлииллэр. Улуус оскуолаларыгар уопсайа 54 учуутал миэстэтэ аһаҕас. Улуус үрдүнэн 24 оскуола, 15 оҕо уһуйаана, 6 эбии үөрэхтээһин дьиэлэрэ оҕолору көрсөргө бэлэмнэрин туһунан үөрэҕэрии салалтатын салайааччыта Юрий Васильевич Кынатов иһитиннэрдэ. Аҕыйах хонугунан бары оскуолаларга маҥнайгы чуораан чугдаарыа. Быйылгы үөрэх сылыгар Үөһээ Бүлүү улууһугар 320 оҕо бастакы кылааска үөрэнэ киирээри маҥнайгы чуорааны долгуйа кэтэһэллэр, — диэн баһылык эбэн эттэ.