Даниил Слепцов «Бэргэн оонньууларын» кыайыылааҕынан буолла!

Бэс ыйын 28 күнүгэр Туймаада Ыһыаҕар уолаттарга аналлаах «Бэргэн оонньууларын» национальнай многоборьеҕа күрэхтэһии түмүктэннэ.

Муҥутуур кыайыылаах аатын Мэҥэ Хаҥалас улууһун уола Даниил Слепцов ылан, Дьокуускайдааҕы үүт собуотун матасыыкылын хаһаайына буолла, диэн ЯСИА иһитиннэрэр.

«Бэргэн оонньууларын» финалыгар сүүмэрдиир күрэхтэһии түмүгүнэн аҕыс бастыҥ уол тахсыбыта. Кыттааччылар үс төгүл үс, тутум эргиир, хапсаҕай, мас-рестлинг уонна 400 миэтэрэҕэ сүүрүү курдук көрүҥнэргэ күрэхтэстилэр.

«Мин национальнай многоборьенан ааспыт күһүн дьарыктанан саҕалаабытым. Ол иннинэ оҕо эрдэхпиттэн остуол тенниһигэр кыттарым, ол гынан баран ааспыт сылга бэйэбин көрдөнөн, национальнай успуорт көрүҥнэрин сөбүлээбитим. Инникитин Дыгын оонньууларыгар кыттар баҕалаахпын. Мин холобур оҥостор киһим – сэттэ төгүллээх чөмпүйүөн Иван Белолюбскай, киниэхэ дьарыктанабын», — диэн Даниил Слепцов ЯСИА-ҕа кэпсээтэ.