Дапсы Ойуунускай аатынан Судаарыстыбаннай бириэмийэнэн наҕараадаланна

Учуонай, лингвист Михаил Алексеев-Дапсы П.А. Ойуунускай аатынан Судаарыстыбаннай бириэмийэнэн наҕараадаланна. 

Михаил Петрович Алексеев-Дапсы — тылы билимин хандьыдаата, СӨ култууратын үтүөлээх үлэһитэ, «Гражданскай килбиэн» бэлиэ хаһаайына, суруналыыс, биллэр лингвист, Арассыыйа билимин академиятын Сибиирдээҕи салаатын үтүөлээх бэтэрээнэ, Үөһээ Бүлүү улууһун Бочуоттаах олохтооҕо.

Кини өр сылларга саха араадьыйатыгар «Биһирэм тыл» биэриини ыыппыта. Саха тыла ыраас, чөл туруктаах буоларыгар кыһаллара, сөпкө саҥарарга үөрэтэрэ. «Саха тылын үйэлээх үгэһин тылдьыта», «Сүр тостубатын»,о.д.а. кинигэлэри суруйбута.

Тыл билимин хандьыдаата, Гуманитарнай чинчийии уонна хотугу аҕыйах ахсааннаах омуктар институттарын аҕа научнай үлэһитэ Айталина Кузьмина үөрүүтүн бу курдук үллэһиннэ:

—Муус устар 25 күнүгэр учууталбыт, кэллиэгэбит, тыл билимин хандьыдаата, «Биһирэм тыл» биэрии ааптара уонна биэрээччитэ Михаил Петрович Алексеев-Дапсы СӨ П.А. Ойуунускай аатынан Судаарыстыбаннай бириэмийэнэн наҕараадаламмытын туһунан сурах кэлэн олус үөрдүбүт. Саха салаатыгар үөрэнэ сырыттахпытына, ис сүрэҕиттэн кыһаллан туран сөпкө саҥарарга үөрэтэрэ, араадьыйаҕа биэриитигэр кытыннарара. Кэлин Гуманитарнай чинчийии институтугар бииргэ үлэлиир кэммитигэр учуонай быһыытынан дириҥник хорутан ырытарын, эдэр дьоҥҥо көмө-ньыма буоларын көрбүтүм. Бочуоттаах сынньалаҥҥа да олордор, ийэ тылбытыгар сыһыаннаах тэрээһиҥҥэ барытыгар көхтөөхтүк кыттар, ыраах улуустарга тиийэ тылын-өһүн дьоҥҥо тиэрдэр. Ону сэргэ, хайдах олорорбутун, хас оҕоломмуппутун өрүү туоһулаһан ыйытар, интэриэһиргиир.