Дархан этээччи оҕолорго оһуокайга маастар-кылаас ыытта

Өрөспүүбүлүкэтээҕи  Оһуокай уопсастыбата, салайааччыбыт Дьулуур Хаан быһаччы салалтатынан үҥкүү тылын этээччилэрэ ханна олороллоруттан тутулуга суох, эдэр көлүөнэни кытта мэлдьи биир сибээһи туталлар.

Бу күннэргэ Сунтаар улууһугар, Тойбохойго, учууталлар кустовой семинардарыгар уопсастыбабыт Дархан этээччитэ Лилия Дмитриевна үөрэнээччилэргэ оһуокайга маастар-кылаас ыытта. Лилия Дмитриевна да, оҕолор да олус астыннылар.
Лилия Дмитриевна Дархан этээччи быһыытынан өрөспүүбүлүкэҕэ киэҥник биллэр. Кини биир уратыта, бириэмэтин хааччахтаабаттара буоллар, төһө баҕарар уһуннук этиэхпин сөп диэччи. 2014 сыллаахха Тойбохойго Оһуокай күрэҕэр кытта бара сылдьан, кини үҥкүүтүн устубутум. Онно кини тохтоло суох биир чаас 22 мүнүүтэ этэн, этээччилэргэ рекорд олохтоон турар. Кини уус-уран хоһуйуута эмиэ ураты дьикти, ордук ойуулаан, дьүһүннээн хоһуйарынан уратылаах.
Дархан этээччи билигин да кыаҕын толору арыйан,айымньылаахтык айа тута сылдьар.

Марта Николаева