«ДАРХАН УУС» быыстапката Мандар Уус үбүлүөйдээх 80 сааһыгар ананна

Бүгүн, олунньу 22 күнүгэр, “Куруһаала” атыы-эргиэн дьиэтигэр Саха сирин тимир уустарын «ДАРХАН УУС» XIV быыстапкатыгар бэрт элбэх киһи сырытта.  

Суолталаах тэрээһин туһунан быыстапкаҕа сырдатыы хайысхатыгар эппиэттээх Гаврил Андросов бу курдук билиһиннэрдэ:

— 14-с сылын ыытыллар «ДАРХАН УУС» быыстапка тимир ууһа, этнограф, өрөспүүбүлүкэҕэ тимир уустарын сойууһун бочуоттаах бэрэссэдээтэлэ, духуобунас академига, П.А. Ойуунускай аатынан судаарыстыбаннай бириэмийэ лауреата, Саха сирин, Таатта улууһун уонна Баайаҕа нэһилиэгин бочуоттаах олохтооҕо Борис Неустроев-Мандар Уус үбүлүөйдээх 80 сааһыгар ананна.

Быыстапка түмүгэр дьүүллүүр сүбэ куонкурус кыайыылаахтарын үс бөлөххө арааран  быһаарда: «Бастыҥ уус-уран оҥоhуулаах быhах»; «Бастыҥ ас быһаҕа»; «Дэгиттэр быһах».  Быйылгы «Дархан Уус» быыстапкаҕа 13 улуустан уонна Дьокуускай куораттан 80 сайаапка киирбитэ. Кэрэхсэбиллээҕэ баар, кэлиҥҥи сылларга  төһө да айана уустугун иһин, Дьааҥы, Өлөөн, Кэбээйи курдук ыраах хоту улуустартан кыттар буоллулар. Быйыл аан бастакытын Усуйаана улууһуттан кыттааччылар кэллилэр. Саха сирин соҕуруу өттүттэн Нерюнгриттэн уустар кытталлар этэ. Ол дьоммут соҕуруу көһөн барбыттарын кэнниттэн, аны Алдантан  кэлэр буоллулар.

Киһи үөрүөҕэ, кыттааччылар ортолоругар ыччаттар элбээтилэр. «Саха быһаҕын уһанан, айахпын ииттиэхпин сөп» диэн толкуй ыччат өйүгэр-санаатыгар иҥнэ. Бэйэҥ оҥоһуккун куйаар ситимин нөҥүө тас дойдуга даҕаны батарыахха сөп буолла. Онон ыччаттарбыт бэйэлэрин иннилэригэр улахан сыалы-соругу туруорунан, өр сылларга уһанан, идэтийбит аҕа көлүөнэ уустары кытта тэбис-тэҥҥэ күрэстэһэр таһымҥа таҕыстылар. 2013-2015 сылларга оскуола оҕолоро эбэтэр Мандар Уус кыһатыгар уһуйуллубут 20 эрэ саастаах уолаттар миэстэлэстэхтэринэ, “уһулуччу чаҕылхай” ураты киһи курдук соһуйа көрөр этилэрэ. Билигин маннык көстүү кэм ирдэбилигэр кубулуйда.  Ол курдук, билигин 30-гар диэри саастаах бэрт элбэх ыччат бастыҥнар кэккэлэригэр сылдьар буолла. Оттон уонча сыллааҕыта миэстэлэһэр эдэр дьон билигин сиппит-хоппут, холобурга сылдьар уустарынан буоллулар.

Быйылгы Саха сирин тимир уустарын XIV сүрүн түһүлгэтин түмүгэ:

«Уус-уран оҥоһуулаах быһах» (9 кыттааччы)

1. Сандал Мордосов (Дьокуускай)
2. Илья Готовцев (Дьокуускай)
3. Феликс Шамаев (Таатта)

«Бастыҥ ас быһаҕа» (70 кыттааччы)

1. Степан Пахомов (Таатта)
2. Гаврил Мохначевскай (Таатта)
3. Сергей Петров (Хаҥалас).

  «Дэгиттэр быһах» (66 кыттааччы)
1. Илья Готовцев (Дьокуускай)
2. Валерий Сидоров (Мэҥэ-Хаҥалас)
3. Родион Шадрин (Мэҥэ-Хаҥалас)