«ДАРХАН УУС»: ирбэт тоҥ хатан тимирин кылаан тургутуга

Саха тимирэ, тимиринэн уһаныы – бу саханы саха дэппит, тыйыс айылҕалаах хоту дойдуга биһигини киһи-хара оҥорбут ытык өйдөбүлбүт. Аныгы кэмҥэ өбүгэ бу түҥ былыргы дириҥ силистээх-мутуктаах үгэһин, идэтин, дьарыгын сөргүтэр, сайыннарар уонна киэҥ эйгэҕэ таһаарар түһүлгэнэн «ДАРХАН УУС» быыстапката буолар.

Быйыл олунньу 22 күнүгэр «Куруһаала» эргиэн киинигэр үгэскэ кубулуйбут Серафим Валерьевич Попов кэриэһигэр «ДАРХАН УУС» Саха сирин тимир уустарын сүрүн быыстапката 15-с төгүлүн дорҕоонноохтук ыытыллыаҕа. Өрөспүүбүлүкэ бастыҥ тимир уустара түмсүбүт улахан түһүлгэлэригэр үгэскэ кубулуйбут «Уус-уран оҥоһуулаах быһах», «Дэгиттэр быһах», «Бастыҥ ас быһаҕа» хайысхаларга чулууттан чулуулар сүүмэрдэниэхтэрэ. Кыайыылаахтар үгэскэ кубулуйбут тимир ууһун статуэткатынан уонна сыаналаах бирииһинэн бэлиэтэниэхтэрэ.

Дьүүллүүр сүбэ үлэтин Ил Дархан «Үлэ киһитэ» бириэмийэтин лауреата, аан дойдутааҕы быһах быыстапкаларын хас да төгүллээх кыайыылааҕа Сарыал Билюкин сүрүннүөҕэ. «Уус-уран оҥоһуулаах быһах» хайысхатыгар Россия ойуулуур-дьүһүннүүр академиятын чилиэн-кэрэспэдьиэнэ, худуоһунньук Дьулустаан Бойтунов сыаналаһыаҕа. Оттон «Бастыҥ ас быһаҕын» тургутугун саха төрүт аһын сөргүтээччи Иннокентий Тарбахов уһуйуллааччылара, «Тыгын Дархан» ресторан шеф-повара Константин Матаннанов салалтатынан ыытыахтара.

Бу эрэ күн «ДАРХАН УУС» Саха сирин тимир уустарын сүрүн түһүлгэтэ Туймаада хочотун бары олохтоохторугар уонна ыалдьыттарыгар сөбүлүү көрбүт оҥоһуктарын ханнык баҕарар маастартан талан ыларга ураты кыаҕы биэрэр! Кэрэ аҥардар күүстээх аҥардаргытыгар дьоһун бэлэҕи булар тоҕооһу мүччү тутумаҥ! Саха истибитинээҕэр көрбүтүн, көрбүтүнээҕэр эт илиитинэн туппутун-хаппытын ордорор.

 

Гаврил АНДРОСОВ,

«ДАРХАН УУС» быыстапка пресс-сэкирэтээрэ