Даши Намдаков быыстапката уонна уустар уран оҥоһуктара

Бэс ыйын 18 күнүгэр, Национальнай ойуулуур-дьүһүннүүр түмэлгэ худуоһунньук, скульптор Даши Намдаков быыстапкатын  кытта Саха сирин ювелирдарын ситимниир тэрээһин буолла.

Даши Намдаков быыстапката олунньу ыйтан турар. Саха төрүт бырааһынньыгын ыһыаҕы көрсө бу быыстапка чэрчитинэн «Петр Алексеев мастарыскыайа» диэн бастакы коллаборация буолла. Былыр ыһыахха, урууга кэтиллэр уустар оҥорбут киэргэллэрин кэрэ аҥаардар кэтэн бар дьоҥҥо хааман көрдөрдүлэр. Бу туһунан түмэл социокултуурунай салааҕа методиһа Шестакова Мария Егоровна санаатын үллэһиннэ:

-Түмэлбитигэр «Ювелирный сезон Даши Намдакова» диэн тэрээһин саҕаланна. Тэрээһин Саха сиригэр биллэр ювелирнай хампаанньалары кытта бииргэ ситимнэһэн оҥоһуллар. Ыһыахтары көрсө «Петр Алексеев мастарыскыайа» диэн хампаанньаны кытта коллаборациябытын көрдөрдүбүт. Бырагыраамабыт икки чаастан турар. Бастакы чааһа быыстапканы көрүү буолар. Маастар көмүстэн, сэлии муоһуттан, боруонсаттан оҥорбут оҥоһуктара былыргы үйэлэр  ускуустубаларын арыйар. Иккис чааспытыгар «Петр Алексеев мастарыскыайа» киэргэллэрин көрдөрүүтэ буолла. Петр Алексеев ураты оҥоһуктарын көрдөрдө. Иккиэн биир идиэйэлээх тэрээһини ситимнээтилэр. Былыргы өбүгэлэрбит ускуустубаларын арыйар суолталаах тэрээһиҥҥэ ардаҕы аахсыбакка элбэх киһи кэлбитэ үөртэ. Кэрэхсээтилэр, сэргээтилэр. Иккис тэрээһин бэс ыйын 25 күнүгэр буолуоҕа, бу туһунан түмэлбит иһитиннэриэҕэ.

Түмэлгэ тэрээһиҥҥэ кэлбит дьон-сэргэ быыстапканы таһынан, Петр Алексеев мастарыскыайын оҥоһуктарын ыалдьыттар ыһыаҕы көрсө атыыластылар, эргэ үрүҥ көмүстэрин илдьэ кэлэн атастастылар.