ДЦП-лаах оҕолору ботулинынан эмтииллэр

Саха сирин быраастара ДЦП-нан ыалдьар оҕолору ботулиновай терапия көмөтүнэн эмтиир буоллулар. Бу маннык диагнозтаах ыарыһах 80%-гар ботокс укуоллара былчыҥ күүрүүтүн үрдэтэргэ (былчыҥ күүрүүтэ намтаатаҕына, киһи, төттөрүтүн, хамсаабат буолар) уонна олоҕун хаачыстыбатын тупсарарга наадалар диэн Дьокуускай куораттааҕы 3 №-дээх балыыһа оҕо неврологиятын отделениетын невролога Елизавета Сивцева 14.ru кэрэспэдьиэнигэр кэпсээтэ.

Икки сыллааҕыта эрэ төрөппүттэр оҕолорун Москва, Санкт-Петербург, Новосибирскай курдук киин куораттарга илдьэргэ күһэллэр этилэрэ. Билигин маннык эмтээһин Дьокуускайга оҥоһуллар буолла.

2024 сыл бүтүүтэ Саха сиригэр 1033 ДЦП-лаах оҕо баар. Кинилэртэн 80 бырыһыаннара «спастическай» көрүҥнээхтэр, онно былчыҥнара кытаатан, сымныыр кыахтара суох буолаллар, ол хамсаныылара хааччахтанарыгар тиэрдэр. Бу симптомнары чэпчэтэр туһугар ботулиновай токсин терапията наада.

«Аҕыс сүүсчэкэ оҕо спастичнай ыарыыга ылларар уонна бары бу терапияҕа наадыйаллар. Ортотунан 3-6 ыйга биирдэ оҥоһуллуон сөп. Эмп дьайыыта болдьоҕуттан уонна кээмэйиттэн тутулуктаах», — диир Елизавета Сивцева.

Эмтээһин Дьокуускай куорат 3 №-дээх поликлиникатыгар уонна Өрөспүүбүлүкэтээҕи  реабилитация уонна спортивнай мэдиссиинэ киинигэр босхо оҥоһуллар.  ДЦП-лаах оҕолорго бары реабилитация, ол иһигэр массаас уонна эмтиир физкультура эмиэ босхо буолар. Бу процедура искэн ыарыылаах, тыҥаҕа вируснай инфекциялаах эбэтэр укуол оҥоһуллар сиригэр тирии ыарыылаах оҕолорго бобуллар.

Елизавета Сивцева 2009 сылтан невролог-быраас быһыытынан үлэлиир, үлэтин улахан дьоҥҥо неврологунан саҕалаабыта. Кэнники икки сыл устата оҕо неврологиятыгар идэтийдэ. «Харысхал» үтүө дьыала пуондатын кытта бииргэ үлэлэһэр, сылга иккитэ Нерюнгритааҕы оҕо дьиэтигэр сылдьан, оҕолорго терапияны оҥорор.