«Дэгэт Аартыга» ураты бырайыагы оҥордулар

“Төрөөбүт сирим улахан быһаарыылара” муниципальнай быраактыка пуорумун иитинэн Бүтүн Арассыыйатааҕы “Бастыҥ муниципальнай быраактыка” күөн күрэс кыайыылаахтарын наҕараадалаатылар.

“Градостроительнай бэлиитикэ, нэһилиэнньэ олоҕун эйгэтин тупсарыыны хааччыйыы уонна олох-дьаһах хомунаалынай  хаһаайыстыбатын сайыннарыы” анал аат үһүс миэстэтин Мэҥэ Хаҥалас улууһун Төҥүлү нэһилиэгэ ылла.

Күөн күрэскэ Төҥүлү нэһилиэгэ “Дэгэт Аартыга” тулаһаны тупсарыы” бырайыагы билиһиннэрдэ.

Аан маҥнай бу Аҕа дойду Улуу сэриитин саллааттарыгар, ол кэм толуу үлэһит дьонугар анаммыта. Ол эрээри, бырайыагы кэҥэтэн биэрэн, Төҥүлү бары устуоруйатын көрдөрдүлэр. “Дэгэт Аартыга” тулаһаҕа норуот маастардарын, тимир, мас уустарын скульптуралара, айымньылара түмүлүннүлэр.

Бырайыак атыттартан уратыта диэн, уларыйыытыгар, араас матырыйаал туһаныллыбытыгар буолар. Итини тэҥэ, уопуттаах маастардар эдэрдэргэ бэйэлэрин билиилэрин үллэстиилэрэ буолар.