Дьэлиҥдэ сонуннара

Ыраах Өлөөн улууһун Дьэлиҥдэтигэр (баһылык А.Егоров) Үлэ сылын чэрчитинэн  саҥа дьиэлэр тутуллан, бөһүөлэк иһэ өссө сэргэхсийдэ.

Ол курдук, Заложнай уулусса 9 №-дээх дьиэтэ үлэҕэ киирэрэ бу кэллэ. Бу түөрт кыбартыыралаах дьиэ хаарбах дьиэттэн көһөрүү бырагырааматынан тутулунна. Оттон 10 кыбартыыралаах атын дьиэ ис үлэтэ силигэ ситэрэ эмиэ чугаһаата.

-Күн-дьыл туһунан кэпсээтэххэ, сүрдээх хойуу хаар түстэ. Улууска тахсыбыт дьаһал быһыытынан, навигация бэҕэһээҥҥиттэн  тохтотулунна. Билиҥҥи туругунан, улуус киинигэр диэри Дьэлиҥдэттэн бөртөлүөтүнэн тиийиэххэ сөп. Сыаната 7 тыһ. солкуобай кэриҥэ (субсидиялаах). Дьон төһө айанныырыттан тутулуктаах. Холобура, ааспыт ыйга 4 рейс оҥоһуллубута, — диир нэһилиэк дьаһалтатын баһылыга Александр Егоров.