«Дэриэбинэчээн» норуот тыйаатыра Бүлүү куоратыгар ыалдьыттаата

Олунньу 7 күһүгэр Кэбээйи улууһун Мукучу нэһилиэгин «Дэриэбинэчээн» норуот тыйаатыра Бүлүү куоратыгар Марк Жирков аатынан оройуоннааҕы култуура киинигэр  норуодунай суруйааччы Дмитрий Наумов «Соргулаах суорумньу» кэмиэдьийэ испэктээгин туруордулар.

Киэһэ 6 чаастан толору мустубут көрөөччүлээх саалаҕа испэктээк саҕаланыаҕыттан көр-күлүү дуораһыйа иһилиннэ, ытыс тыаһа хабыллан олордо.

Испэктээк кэнниттэн киирии билиэтинэн тыа сирин минньигэс, иҥэмтэлээх астарын соһуччу бэлэх уунаммыт, кэрэни кэрэхсиир көрөөччүлэрбитин үөртүбүт.

Быйыл Кэбээйи улууһугар Олоҥхо ыһыаҕа буоларынан көрөөччүлэрбитин күндү ыалдьыт буолалларыгар ыҥырдыбыт. Ону тэҥэ испэктээккэ киирбит харчыттан олоҥхо пуондатыгар 30 тыһыынча солкуобайы үөрэ-көтө уктубут.

Күндү дьоммутугар, көрөөччүлэрбитигэр бу курдук дохсун, истиҥ ытыскыт тыаһынан хас биирдии ыалдьыты көрсөргүтүгэр өссө төгүл махтанабыт! Эһигини мэлдьи Айыы сырдык сыдьаайа арчылыы, араҥаччылыы сырыттын!

Вера Прокопьева, Мукучу