«Детдомҥа барыахпын баҕарбаппын…» видеоҕа Оҕо быраабын көмүскүүр боломуочунай санаатын үллэһиннэ

«Детдомҥа барыахпын баҕарбыппын» диэн ытыы-ытыы саҥарар уолчаан видеота өрөспүүбүлүкэни тилийэ көттө. Онно оҕо саҥатыгар иһиллэринэн, ийэтэ эмиэ испит, онон ийэтин төрөппүт быраабын быспыттар диэн этиллэр. Бу быһылаан тула СӨ Оҕо быраабын көмүскүүр боломуочунай Туяра Валерьевна Васильева санаатын үллэһиннэ:

-Видеоҕа көстөр уол үс оҕолоох дьиэ кэргэн оҕото буолар. Төрөппүттэрэ иккиэн тулаайахтар. Оҕолор аҕалара 2022 с. ыалдьан  олохтон барбыт. Биһиги эрдэ бу ыал кыһалҕатынан үлэлэһэ сылдьыбыппыт. Ол курдук ыал аҕата олохтон барбытын кэннэ кыбартыыратын кэргэнигэр тиксэриигэ үлэлэспиппит. Тоҕо диэтэххэ, ийэ кыбартыыраҕа суруллубатах этэ. Онон кыбартыыраны суут нөҥүө оҕолордоох огдообо хаалбыт ийэҕэ биэрэри ситиспиппит. Бу дьыл от ыйыгар эпиэкэ уорганнара үс оҕолоох ийэни ийэ быраабын быһар туһунан суукка биэрбиттэрэ. Суут быһаарыытынан, ийэ быраабын хааччахтааһын туһунан быһаарыныы тахсыбыта. Ийэни кытта кэпсэтэн аһыы утахтан эмтэниини ааһыы туһунан кэпсэтэ сылдьыбытым. Ийэ эмтэниини ааһарга сөбүлэһэр. Онон билиҥҥи туругунан кини Үрдүкү суукка аппелляция биэрдэ. Бу боппуруос мин тус хонтуруолбар сылдьар. Ийэҕэ чөлгө түһүүнү этэҥҥэ ааһарыгар көмөлөһүөхпүт, оччоҕуна оҕолор түргэнник ийэлэригэр, төннөрүллүөхтэрэ  этэ.