Дьиэ аннынааҕы турбалары соруйан уоттуур киһини көрдүүллэр

Дьокуускайга үс аҥаар сыл устата соруйан дьиэ аннынааҕы итии, тымныы уу ааһар турбаларын уоттаан элбэх кыбартыыралаах дьиэлэр олохтоохторугар саахалы оҥорор киһи кимэ күн бүгүнүгэр диэри биллибэт. Дьокуускайдааҕы ТЭЦ суһал-диспиэччэрскэй сулууспата уопсайа 180 маннык соруйан уматыыны бэлиэтээбит.

Маннык уматыылар куорат араас оройуоннарыгар тахсаллар эбит. Ордук Кузьмина, Можайскай уулуссатыгар баар дьиэлэр теплотрассалара эмсэ5элээбиттэр. Ол курдук, Гагаринскай уокурукка уопсайа 80 саахалы чөлгө түһэрэр үлэ ыытыллыбыт. 50 уматыы Промышленнай уокурук дьиэлэригэр тахсыбыт. Ордук Кальвица, Бестужев-Марлинскай уулуссаларын дьиэлэрин аннынааҕы пластик турбалары умаппыттар. Ону таһынан, Центральнай, Губинскай, Октябрьскай, Строительнай уокуруктарга маннык түгэн эмиэ хатыламмыт.

Хара санаалаах киһи дьайыыларыттан олохтоохтор уута-хаара, кыһыҥҥы кэмҥэ хаһан саахал чөлгө түһүөр диэри ититиитэ да суох олоруохтарын сөп. Манан ситимнээн, Дьокуускай олохтоохторун тугу эмит уорбалыы көрдүгүт даҕаны быраабы араҥаччылыыр уорганнарга эбэтэр Дьокуускайдааҕы ТЭЦ диспиэччэрскэй сулууспатыгар 21-58-49 нүөмэргэ эрийэн иһитиннэрэр туһунан этэллэр.