Дьиэ чааттарын «Max» мессенджерга көһөрүү туһунан сокуон ылылынна

Судаарыстыбаннай Дуума элбэх кыбартыыралаах дьиэ сэбиэтин чилиэннэригэр баайы-дуолу көрүүгэ-харайыыга үлэ уонна өҥө толоруллуутун туһунан докумуоннарга илии баттыыр боломуочуйаны биэрии туһунан сокуон барылын иккис уонна үһүс ааҕыыга ылынна.

Докумуон Дуума электроннай баазатыгар таҕыста. Ону таһынан, сокуон барыла идэлээх тэрилтэлэри олохтоохтору кытта «Max» мессенджергэ баар дьиэ чааттарын нөҥүө алтыһарга эбээһинэстиир. Алтыһыы сөптөөх бэрээдэгин, ону тэҥэ уопсай баайы-дуолу көрүүгэ-харайыыга үлэни тутуу докумуоннарыгар илии баттааһын регламенын Тутуу министиэристибэтэ олохтуоҕа.

MAX — VK хампаанньа оҥорбут дойду мессенджера. Сыыппара сайдыытын уонна сибээс министиэристибэтин өйөбүлүнэн оҥоһуллубута. Бета-барылын кулун тутарга киэҥ эйгэҕэ билиһиннэрбиттэрэ. Бэс ыйыгар премьер Михаил Мишустин дьаһалга илии баттаабыта, онно сөп түбэһиннэрэн сервис национальнай мессенджер буолбута.

Санаттахха, Судаарыстыбаннай Дуума информ-бэлиитикэҕэ кэмитиэтэ маҕаһыыннарга «Max» мессенджер нөҥүө сааһы бигэргэтиини киллэрэргэ этии киллэрбитэ. Бу арыгыны, табаҕы, энергетиктары уонна сокуоннай саастарын ситэ илик оҕолорго бобуллар  табаардары атыылааһын туһунан этиллэр.