Дьиэ иһиттэн радиатордары уорууга 43 саастаах эр киһи уорбаланар

ИДьМ «Дьокуускайдааҕы» 3 №-дээх полиция отделын дьуһуурунай чааһыгар киин куорат олохтооҕо чааһынай дьиэтиттэн биэс радиатор уоруллубутун туһунан сайабылыанньа түһэрбит.

Суһал-ирдир тэрээһиннэринэн  полиция отделын холуобунай ирдэбил үлэһиттэрэ буруйу оҥорууга сыһыаннаах, урут сууттана сылдьыбыт 43 саастаах олохтоох киһини туттулар.

ИДьМ пресс-сулууспата иһитиннэрэринэн, силиэстийэнэн быһаарыллыбытынан, эмсэҕэлээччи дьиэтин атыыга туруорбут, ол иһин онно ким да олорбот эбит. Аттынан ааһан иһэн, хара санаалаах эр киһи дьиэ кураанах турарын бэлиэтии көрбүт. Иһирдьэ киирэн, биэс радиаторы уорбут. Ол кэннэ уорбаланааччы өрөмүөн оҥоро сылдьар ыалларыгар киирэн, чугастааҕы дьиэ саҥа хаһаайынын сымыйалаан, уоруллубут радиатордары 8 тыһыынча солкуобайга атыылаабыт. РФ Холуобунай кодексатын 158-с ыстатыйатын 2-с чааһынан («Уоруу») холуобунай дьыала тэрилиннэ. Эр киһи 5 сылга диэри болдьоххо көҥүлэ быһыллыан сөп.