“Дьиэ кэргэн” бэрэсидьиэн национальнай бырайыагынан Оҕо искусствотын 7 оскуолатын хааччыйдылар

Дойду Бэрэсидьиэнэ Владимир Путин көҕүлээбит “Дьиэ кэргэн” национальнай бырайыагын чэрчитинэн өрөспүүбүлүкэҕэ искусство 7 оскуолатын муусука саҥа тэрилинэн, оборудованиенан, литературанан хааччыйдылар.

Бу сыалга 27 мөл. солк. үп көрүллүбүт, ол иһигэр 24,5 мөл. солк. федеральнай бүддьүөттэн.

“Удачнайга, Ленскэйгэ, Белай Гораҕа, Тиксиигэ, Булгунньахтаахха, Чурапчыга уонна Бороҕоҥҥо Оҕо искусствотын оскуолалара аныгы тэрили туттулар. Бу барыта оҕолор талааннарын сайыннаралларыгар көмөлөһүөҕэ. “Дьиэ кэргэн” национальнай бырайыак көмөтүнэн дьарыктанарга үчүгэй усулуобуйа тэриллэр”, — диэтэ өрөспүүбүлүкэ баһылыга Айсен Николаев.

Бороҕон оскуолатыгар (Уус Алдан) “Соната” пианино, “Юпитер” баян, балалайкалар, домра, скрипка уо.д.а. бэрилиннэ.

Арктикаҕа сытар Белай Гора Оҕо искусствотын оскуолатыгар “Амадеус” пианиноны уонна анал аксессуардары ылан биэрдилэр. Өссө профессиональнай “Тула” баяны, аныгы графическай   планшеттары уо.д.а.

Тиксии оскуолатын хореография саалалара  анал  сиэркилэлэринэн уонна аныгы станоктарынан хааччылыннылар.

Ленскэй куорат  оскуолата материальнай баазата роялынан уонна “Соната” мааркалаах үс пианинонан, “Ритмюллер” пианинонан эбилиннэ.

Булгунньахтаах (Хаҥалас) оскуолата классическай гитаралары, домралары, балалайкалары, акустическай пианиноны уо.д.а. тутта.

Чурапчытааҕы Оҕо искусствотын  оскуолата эмиэ муусука инструменнарын сэргэ миэбэли ылла.

Мииринэй Удачнайыгар таксидермическай чуучалалары аҕалыахтара.

Онон, дойду Бэрэсидьиэнэ Владимир Путин көҕүлээбит “Култуура” национальанй бырайыагынан өрөспүүбүлүкэҕэ 2019-2024 сылларга култуура 7 дьиэтэ үлэҕэ киирдэ, 41 модельнай бибилэтиэкэ тэрилиннэ, 35 киинэ саалата саҥардылынна.