Дьиэ кэргэн бэстибээлин кыайыылаахтарын айаннара уонна олорор сирдэрэ төлөнүөҕэ

Быйыл Арассыыйаҕа биллэриллибит Дьиэ кэргэн сылын үөрүүлээхтик арыйыы тохсунньу 19 күнүгэр дойду тэбэр сүрэҕэр Москваҕа ВДНХ-ҕа ыытыллыаҕа.

Тэрээһин «Чугас дьоммут – тапталлаахтарбыт» Бүтүн Арассыыйатааҕы Дьиэ кэргэн пуорумун чэрчитинэн ыытыллыаҕа.

Саха сиригэр Дьиэ кэргэн сылын арыйыы үөрүүлээх тэрээһиннэрэ тохсунньу 19 күнүттэн олунньу 4 күнүгэр диэри ыытыллыахтара. Бу туһунан СӨ Үлэ уонна социальнай сайдыы миниистирэ Елена Волкова куйаар ситиминэн ыыппыт киэҥ ыҥырыылаах мунньаҕар иһитиннэрбитэ.

Министиэристибэ пресс-сулууспата бэлиэтээбитинэн, мунньах кэмигэр тэрээһин боппуруостарын ырытыыга Елена Волкова «Сыл бастыҥ дьиэ кэргэнэ», «Сыл аҕата», «Аҕа күрэҕэ» курдук өрөспүүбүлүкэтээҕи куонкурустарга, «Дьиэ кэргэнинэн бииргэ» Арассыыйатааҕы бырайыакка болҕомтону уурарга сорудахтаата. Ол курдук, миниистир «Сыл бастыҥ дьиэ кэргэнэ» куонкурус муниципальнай түһүмэҕин 2024 сыл бастакы кыбаарталыгар ыытарга этии киллэрдэ.  2023 сыл алтынньытыгар «Сыл бастыҥ дьиэ кэргэнэ» куонкурус кыайыылаахтара өрөспүүбүлүкэтээҕи уонна Арассыыйатааҕы таһымнаах бэстибээллэргэ кытталларыгар айаннарын уонна олорор сирдэрин төлөбүрүгэр сыһыаннаан Саха сирин Аҕа баһылыгын ыйааҕар уларытыы киллэриллибитэ.  Быйылгыттан ыла кыайыылаах дьиэ кэргэттэргэ айаннарын уонна олорор сирдэрин ороскуота босхо буолуоҕа», – диэн куйаар ситиминэн ыытыллыбыт мунньахха иһитиннэрдэ Елена Волкова. Дьиэ кэргэттэр куонкуруска сэттэ номинациянан кыттыахтара: «Эдэр ыал», «Элбэх оҕолоох ыал», «Тыа сирин ыала», «Үгэстэри харыстыыр дьиэ кэргэн», «Көс ыал», «Көмүс ыал» уонна «Оҕо ииттэр ыал».