Дьиэ кэргэн элбэх хайысхалаах алта киинэ үлэлиир

Дьокуускайга уопсастыбанньыктар  кыттыылаах «Духовно-нравственные основы материнства и актуальные вопросы общественно-государственного партнёрства на современном этапе развития общества» диэн «төгүрүк остуол» буолла.

Тэрээһиҥҥэ СӨ үлэҕэ уонна социальнай сайдыыга миниистирэ Елена Волкова дьиэ кэргэни өйүүргэ уонна саҥа технологиялар сайыннарарга  олоххо киллэриллэр соруктары уонна дьаһаллары билиһиннэрдэ. Биир оннук саҥаны киллэриинэн дьиэ кэргэн элбэх хайысхалаах кииннэрэ (СМФЦ) буолар.

«СМФЦ – Арассыыйа Үлэҕэ министиэристибэтин боруобалыыр бырайыагын чэрчитинэн киллэриллэр үлэ саҥа технологията. Ол соруга -– дьиэ кэргэҥҥэ тахсар ыарахан балаһыанньалары эрдэ сэрэтиини уонна булууну күүһүрдүү. Билигин эрэгийиэҥҥэ хайыы үйэ дьиэ кэргэн элбэх хайысхалаах алта киинэ Дьокуускайга, Чурапчы, Нам, Уус Алдан Өлүөхүмэ уонна Мииринэй улуустарыгар үлэлиир. Дьиэ кэргэн элбэх хайысхалаах кииннэрин тэрийии бырайыага РФ бэрэсидьиэнэ Владимир Путин сорудаҕынан олоххо киллэриллэр уонна «Дьиэ кэргэн» национальнай бырайыак биир сүрүн соругунан буолар», -– диэн Елена Волкова эттэ.
Маннык кииннэр араас өҥөнү ыларга уонна дьиэ кэргэҥҥэ тахсар балаһыанньалары быһаарарга социальнай партнердар уонна «биир кэлим түннүк» түмсэр сиринэн буолуохтаахтар.
Саха сиригэр маннык кииннэри тэрийэр соругу СӨ Ил Дархана Айсен Николаев өйөөбүтэ.
Сиһилии : https://www.sakha.gov.ru/news/14377

СӨ Ил Дарханын уонна бырабыыталыстыбатын пресс-сулууспата